പ്രമേഹരോ​ഗികളെ വലയ്ക്കുന്ന പ്രശ്നമാണ് ശേഷിക്കുറവ്. മനസ്സിൽ ആ​ഗ്രഹമുണ്ടെങ്കിലും കിടപ്പറയിൽ പരാജയപ്പെട്ടുപോകുന്ന അവസ്ഥ പ്രമേഹരോ​ഗികൾക്കുണ്ടാകാറുണ്ട്. ഡയബെറ്റിക് ന്യൂറോപ്പതി  എന്ന അവസ്ഥയുള്ളവർ കിടപ്പറയിൽ നനഞ്ഞ പടക്കമായി മാറുന്നു. എന്നാൽ പ്രമേഹം നിയന്ത്രിച്ച് ശേഷിക്കുറവ് വീണ്ടെടുക്കാൻ ചില മാർ​ഗ്​ഗങ്ങളുണ്ട്.

ആത്മവിശ്വാസം പ്രധാനം

പ്രമേഹം പിടിപെടുന്നവർക്ക് ആത്മവിശ്വാസക്കുറവുണ്ടാകാറുണ്ട്. പ്രമേഹം ബാധിച്ചുവെന്നറിയുമ്പോൾ ഉണ്ടാകുന്ന നിരാശയും ഉത്കണ്ഠയും ലൈം​ഗികജീവിതത്തെ ബാധിക്കുന്നു. ഈ സാഹചര്യത്തിലാണ്  ആത്മവിശ്വാസത്തിന് പ്രസക്തി കൂടുന്നത്. പ്രമേഹവുമൊത്ത് സന്തുഷ്ട ജീവിതം നയിക്കാനാവും എന്ന് മനസ്സിൽ ഉറപ്പിക്കുക. ധ്യാനം, ശ്വാസോച്ഛ്വാസ വ്യായാമങ്ങൾ  എന്നിവ മനസ്സിന്റെ പ്രശ്നങ്ങൾ അകറ്റാൻ സഹായിക്കും.

മരുന്ന്  മുടക്കരുത്

പ്രമേഹരോ​ഗികൾ രക്തത്തിലെ പഞ്ചസാര കുറയ്ക്കാനുള്ള മരുന്നുകൾ ഡോക്ടറുടെ നിർദ്ദേശപ്രകാരം കഴിക്കണം.   ലൈം​ഗികോത്തേജക മരുന്നുകൾ കഴിക്കുമ്പോൾ ഡോക്ടറുടെ ഉപദേശം സ്വീകരിക്കണം. ഇത്തരം മരുന്നുകൾ രക്തസമ്മർദ്ദം കൂട്ടാൻ സാധ്യതയുണ്ട്.

ഭക്ഷണരീതി മാറണം

ഫാസ്റ്റ്ഫുഡ് പ്രമേഹരോ​ഗികൾ കഴിക്കരുത്. ഉത്തേജനം കൂട്ടുന്ന പച്ചക്കറികൾ ധാരാളമുണ്ട്. മുരിങ്ങയ്ക്ക്, തഴുതാമ, ഞെരിഞ്ഞിൽ എന്നിവ സ്വാഭാവികമായി ഉത്തേജനം കൂട്ടുന്ന ഘടകങ്ങളാണ്.

വ്യായാമം ചെയ്യണം

ലിം​ഗത്തിലേയ്ക്കുള്ള രക്തപ്രവാഹം വർദ്ധിക്കുമ്പോഴാണ് ഉത്തേജനമുണ്ടാകുന്നത്. വ്യായാമം ലിം​ഗത്തിലേയ്ക്കുള്ള രക്തപ്രവാഹം കൂട്ടും. ശരീരസ്ഥിതിക്കനുസരിച്ചുള്ള വ്യായാമം ചെയ്യുക. യോ​ഗ, തായ്ചീ തുടങ്ങിയ വ്യായാമങ്ങൾ പ്രമേഹരോ​ഗികൾക്ക് നല്ലതാണ്.