ചോദ്യം:എന്റെ മകൾക്ക് 15 വയസ്സുണ്ട്. സാധാരണയിൽ കവിഞ്ഞ ശാരീരിക വളർച്ചയാണ് അവൾക്ക്. അമിതവണ്ണം കാരണം അവൾക്ക് അപകർഷതാബോധമാണ്. സഹപാഠികൾ കളിയാക്കുന്നതായി അവൾ പറയുന്നു. അമിതവണ്ണം മാറാൻ എന്താണ്  ചെയ്യേണ്ടത്?

സുമ
പത്തനംതിട്ട
ഉത്തരം: മകളുടെ ആഹാരകാര്യത്തിൽ ശ്രദ്ധപുലർത്തണം. ജ​ങ്ക്ഫുഡ് പൂർണ്ണമായും ഒഴിവാക്കണം. അമിതവണ്ണം ഒരു ദിവസം കൊണ്ട് ഉണ്ടാകുന്നതല്ല. കുട്ടിക്കാലത്ത് ജങ്ക്ഫുഡ് ശീലിച്ചതിന്റെ പരിണിതഫലമാണത്.  അമിതവണ്ണത്തോടൊപ്പം മാസമുറ ക്രമമായി വരാതിരിക്കുക, താടിയിലും നെഞ്ചത്തും തുടയിലുമൊക്കെ ആണുങ്ങളെപ്പോലെ രോമവളർച്ച ഉണ്ടാകുക എന്നിവയുണ്ടെങ്കിൽ ശ്രദ്ധിക്കണം. 
ഇതൊക്കെ പോളിസിസ്റ്റിക് ഓവറി സിൻഡ്രോമിന്റെ ലക്ഷണങ്ങളാണ്. ഈ രോ​ഗത്തിനുള്ള പ്രതിവിധിയും വണ്ണം കുറയ്ക്കുകയാണ്. സ്ത്രീകൾക്ക് മാത്രമുള്ള ജിമ്മിൽ പോയി വ്യായാമം ചെയ്യാം. യോ​ഗ, സൈക്ക്ളിങ്ങ്, നീന്തൽ എന്നിവയും വണ്ണം കുറയ്ക്കാൻ നല്ലതാണ്. അമിതവണ്ണം കാരണം അപകർഷതാബോധമുണ്ടെങ്കിൽ സൈക്കോളജിസ്റ്റിനെ കാണിച്ച് കൗൺസിലിങ്ങ് നൽകണം.