ചോദ്യം:എനിക്ക് 26 വയസ്സുണ്ട്. ടോൺസിലൈറ്റിസാണ് എന്നെ അലട്ടുന്ന പ്രശ്നം. ഇത് മാറാൻ എന്തു ചെയ്യണം?

ദീപ
കൊല്ലം

ഉത്തരം: ടോൺസിലൈറ്റിസ് ശരീരത്തിന്റെ പ്രതികരണമാണ്. ഫാസ്റ്റ്ഫുഡ് കഴിക്കുന്നവർക്കും, മാംസ്യാഹാരപ്രിയർക്കുമാണ് ഇത് കൂടുതലായി കണ്ടുവരുന്നത്. ആദ്യം ഭക്ഷണത്തോട് താത്പര്യമില്ലായ്മ, വായ് കയ്പ് അരുചി എന്നിവ അനുഭവപ്പെടും. അസുഖം കൂടുമ്പോൾ ഭക്ഷണമിറക്കാൻ പ്രയാസമാകും.
ചികിത്സിച്ചില്ലെങ്കിലും ഏതാനും ദിവസം കൊണ്ട് രോ​ഗം കുറയും. വെള്ളം ധാരാളം കുടിക്കുന്നതിലൂടെ മാത്രം ഇതിൽ നിന്നും മുക്തിനേടാം. അതോടൊപ്പം ഡയറ്റിൽ ശ്രദ്ധിക്കുകയും വേണം. ഫാസ്റ്റ്ഫുഡ്, മാംസ്യാഹാരം, എണ്ണയും നെയ്യുമടങ്ങിയ ഭക്ഷണങ്ങൾ എന്നിവ ഒഴിവാക്കണം. പാൽ, മുട്ട എന്നിവ കഴിക്കുന്നതും കുറയ്ക്കണം. പച്ചക്കറികൾക്ക് മുൻതൂക്കമുള്ള ഡയറ്റ് സ്വീകരിക്കണം.