ഡോ.​ഗോപുജി പണ്ഡിറ്റ്
റിട്ട. പ്രൊഫസ്സർ,​ഗവ: ആയുർവേദകോളേജ്, തിരുവനന്തപുരം

എനിക്ക് കഴിഞ്ഞ മൂന്നുവർഷമായി രക്തസമ്മർദ്ദമുണ്ട്. രക്തസമ്മർദ്ദത്തിന് ആയുർവേദചികിത്സ ഫലപ്രദമാണോ? ഏതുതരത്തിലുള്ള

വ്യായാമമാണ്   അനുയോജ്യം?
രാജു, തിരുവനന്തപുരം
രക്തസമ്മർദ്ദത്തിന് ആയുർവേദമരുന്നുകൾ ഫലപ്രദമാണ്. രക്തസമ്മർദ്ദത്തിന്റെ കാരണമറിഞ്ഞാണ് ആയുർവേദത്തിൽ ചികിത്സ നിശ്ചയിക്കുന്നത്. മാനസികസംഘർഷം കാരണമുണ്ടാകുന്ന രക്തസമ്മർദ്ദത്തിന് മാനസമിത്രവടകം ​ഗുളിക ഡോക്ടറുടെ നിർദ്ദേശാനുസരണം കഴിക്കണം. മാനസികസംഘർഷമല്ല രക്തസമ്മർദ്ദത്തിന് കാരണമെങ്കിൽ പാർത്ഥാരിഷ്ടം ഡോക്ടറുടെ നിർദ്ദേശപ്രകാരം കഴിക്കണം.
നാട്ടുമരുന്നുകളും  രക്തസമ്മർദ്ദത്തിന് നല്ലതാണെന്ന് തെളിഞ്ഞിട്ടുണ്ട്. തഴുതാമ, സർപ്പ​ഗന്ധി, കല്ലുറുഞ്ചി തുടങ്ങിയവയിലേതെങ്കിലുമിട്ട് തിളപ്പിച്ചാറ്റിയ വെള്ളം കുടിക്കുന്നത് രക്തസമ്മർദ്ദം കുറയ്ക്കും.
നടത്തം, ജോ​ഗിങ്ങ്, യോ​ഗ എന്നിവയാണ് രക്തസമ്മർദ്ദമുള്ളവർക്ക് അനുയോജ്യമായ വ്യായാമങ്ങൾ. ഈ വ്യായാമങ്ങളിൽ  ഓരോ വ്യക്തികളുടെയും ശാരീരികസ്ഥിതിക്കനുയോജ്യമായ വ്യായാമം തിരഞ്ഞെടുക്കാം.