ദുൽഖർ സൽമാന്റെ രണ്ടാമത്തെ ബോളിവുഡ് ചിത്രം സോയ ഫാക്ടർ അടുത്ത മാസം 20 ന് തിയേറ്ററുകളിൽ എത്തും. ടെലി ഷോപ്പിംഗ് പരസ്യങ്ങളെ പരിഹസിച്ചു കൊണ്ടുള്ള ചിത്രത്തിന്റെ ടീസർ, അണിയറ പ്രവർത്തകർ കഴിഞ്ഞ ദിവസം പുറത്ത് വിട്ടിരുന്നു. കര്‍വാന് ശേഷം ദുൽഖർ നായകനാകുന്ന രണ്ടാമത്തെ ബോളിവുഡ് ചിത്രമാണ് സോയ ഫാക്ടർ. അഭിഷേക് ശർമ്മ സംവിധാനം ചെയ്യുന്ന ചിത്രത്തിൽ സോനം കപൂറാണ് നായിക ആയി എത്തുന്നത്. അനുജ ചൗഹാന്റെ നോവൽ ' ദി സോയ ഫാക്ടറിനെ ' ആധാരമാക്കിയാണ് ചിത്രം എത്തുന്നത്. സോയ എന്ന പെൺകുട്ടി ഇന്ത്യൻ ക്രിക്കറ്റ്ടീമിലേക്ക് എത്തുന്നതാണ് നോവലിന്റെ പ്രമേയം. ചിത്രത്തിൽ ഇന്ത്യൻ ക്രിക്കറ്റ് ടീം ക്യാപ്റ്റൻ ആയാണ് ദുൽഖർ എത്തുന്നത്. സിനിമയ്ക്കു വേണ്ടി താരം ഒരു മാസം കൊച്ചിയിൽ ക്രിക്കറ്റ് പരിശീലനം നടത്തിയിരുന്നു.