നടി പാർവതി നായരുടെ വീട്ടിൽ വൻ മോഷണം. ചെന്നൈ നുങ്കംപാക്കത്തുള്ള വീട്ടിലാണ് മോഷണം നടന്നത്. ഒരാഴ്ചയോളം പാർവതി സ്ഥലത്തില്ലായിരുന്നു. തിരികെ വീട്ടിൽ മടങ്ങിയെത്തിയപ്പോഴാണ് വിലപിടിപ്പുള്ള വസ്തുക്കൾ മോഷണം പോയതായി കണ്ടെത്തിയത്. ഒമ്പത് ലക്ഷം രൂപ വിലമതിക്കുന്ന വാച്ചുകൾ, 1.3 ലക്ഷം രൂപയുടെ ഹാൻഡ്‌സെറ്റ്, രണ്ട് ലക്ഷം രൂപയുടെ ലാപ്‌ടോപ് എന്നിവയാണ് മോഷണം പോയത്. നടി വ്യാഴാഴ്ചയാണ് പരാതി നൽകിയത്.

വീട്ടുജോലിക്കാരനായ പുതുക്കോട്ട സ്വദേശി ബോസിനെ(33) ഫോണിൽ ബന്ധപ്പെട്ടെങ്കിലും പ്രതികരിച്ചിട്ടില്ല. പരാതിയുടെ അടിസ്ഥാനത്തിൽ പൊലീസ് സംഘം നടിയുടെ വീട്ടിലെത്തി പ്രാഥമിക അന്വേഷണം നടത്തി.