ദക്ഷിണ കൊറിയയില്‍ നടക്കുന്ന സിയൂള്‍ വെബ് ഫെസ്റ്റിവലിലേക്ക് മത്സരിക്കാന്‍ മലയാളത്തില്‍ നിന്നൊരു വെബ് സീരിസ്. വൈശാഖ് റീത്ത സംവിധാനം ചെയ്ത 'എന്നും വരുന്ന ധൂമകേതു' എന്ന പേരിലുള്ള മലയാളം വെബ് സീരീസാണ് മത്സരവിഭാഗത്തിലേക്ക് തെരഞ്ഞെടുക്കപ്പെട്ടിരിക്കുന്നത്. ജീവിതത്തില്‍ തന്റേതായ ഇടം നേടുന്നതിനായി സ്ത്രീകള്‍ നേരിടുന്ന പ്രതിസന്ധിയെക്കുറിച്ചാണ് ധൂമകേതു പറയുന്നത്.

ചിത്രത്തിന് കഥയും തിരക്കഥയും നിര്‍വഹിച്ചിരിക്കുന്നത് കൃഷാന്ത് ആര്‍ കെയാണ്. 24-ാമത് കേരള അന്താരാഷ്ട്ര ചലച്ചിത്രോത്സവത്തില്‍ മത്സരവിഭാഗത്തില്‍ ഭാഗമായിരുന്ന വൃത്താകൃതിയിലുള്ള ചതുരം എന്ന സിനിമ സംവിധാനം ചെയ്തയാളാണ് കൃഷാന്ത്. ലോകത്തെ പലരാജ്യങ്ങളില്‍നിന്നുള്ള വെബ് സീരീസുകള്‍ പ്രദര്‍ശിപ്പിക്കുന്ന വേദിയാണ് സിയൂള്‍ ഫെസ്റ്റിവല്‍.

നന്ദിനി ഗോപാലകൃഷ്ണന്‍, സ്റ്റെഫി മരിയ രാജു, രാഹുല്‍ രാജഗോപാല്‍, ശ്രീജിത്ത് ബാബു, മിഥുന്‍ എസ് കുമാര്‍, ശ്രീനാഥ് ബാബു തുടങ്ങിയവരാണ് ഈ വെബ് സീരിസില്‍ അഭിനയിച്ചിരിക്കുന്നത്. അജ്മല്‍ ഹസ്ബുള്ളയാണ് വെബ് സീരിസിലെ സംഗീത സവിധാനം.