ഓൺലൈൻ റിലീസിങ്ങുമായി ബന്ധപ്പെട്ട് മലയാള സിനിമാ നിർമ്മാതാക്കളും തീയേറ്റർ ഉടമകളും തമ്മിലുള്ള പ്രശ്നം പരിഹരിക്കാൻ ഇന്ന് കൊച്ചിയിൽ യോഗം ചേരും. 11 മണിക്ക് ഫിലിം ചേംബറിന്റെ ആഭിമുഖ്യത്തിൽ നടത്തുന്ന യോഗത്തിൽ ചലച്ചിത്ര വിതരണക്കാരുടെ പ്രതിനിധികളും പങ്കെടുക്കും . ഓൺലൈൻ റിലീസ് , തീയേറ്റർ വിഹിതത്തിലെ കുടിശിക എന്നീ കാര്യങ്ങളായിരിക്കും യോഗത്തിൽ പ്രധാനമായും ചർച്ച ചെയ്യുക . വിജയ് ബാബു നിർമ്മിച്ച സൂഫിയും സുജാതയും ഒ.ടി.ടി. റിലീസിന് തീരുമാനിച്ചതോടെയായിരുന്നു ഓൺലൈൻ റിലീസ് വിവാദം ചൂടുപിടിച്ചത് . തീയേറ്ററുകൾ അടഞ്ഞുകിടക്കുന്ന സാഹചര്യത്തിൽ തങ്ങൾ പ്രതിസന്ധിയിലാണെന്നും ഒ.ടി.ടി. റിലീസ് അതിനൊരു പരിഹാരമാണെന്നുമാണ് പ്രൊഡ്യൂസേഴ്സ് അസോസിയേഷന്റെ നിലപാട് . അതേസമയം ഓൺലൈൻ റിലീസിന് ശ്രമിക്കുന്നവരുമായി ഭാവിയിൽ സഹകരിക്കില്ലെന്ന് തീയേറ്റർ ഉടമകൾ നേരെത്തെ  വ്യക്തമാക്കിയിരുന്നു .