വെഞ്ഞാറമൂട് പോലീസ് സ്റ്റേഷനിലെ സി ഐ ഉൾപ്പടെ ചില പോലീസ് ഉദ്യോഗസ്ഥർ കോവിഡ് നിരീക്ഷണത്തിലായ സംഭവവുമായി ബന്ധപ്പെട്ട് നടൻ സുരാജ് വെഞ്ഞാറമൂടും ക്വാറന്റൈനിൽ. വെഞ്ഞാറമൂട് സിഐ കഴിഞ്ഞ ദിവസം അറസ്റ്റ് ചെയ്ത അബ്കാരി കേസിലെ പ്രതി കോവിഡ് ബാധിതനാണെന്ന് കണ്ടെത്തിയതിനെ തുടർന്നാണ് പൊലീസുകാർ നിരീക്ഷണത്തിലായത്. രോഗിയുമായി നേരിട്ട് ബന്ധം പുലർത്തിയ സി ഐയ്ക്കൊപ്പം വേദി പങ്കിട്ടതോടെയാണ് താരത്തെയും സുരക്ഷയുടെ ഭാഗമായി നിരീക്ഷണത്തിൽ ആക്കിയത്. മദ്യം സൂക്ഷിച്ചതിനും മദ്യപിച്ച് വാഹനം ഓടിച്ചതിനുമാണ് കഴിഞ്ഞ ദിവസം മൂന്ന് പേരെ വെഞ്ഞാറമൂട് പോലീസ് അറസ്റ്റ് ചെയ്തത്. മദ്യപിച്ച് അപകടമുണ്ടാക്കി നിർത്താതെ പോയ മൂന്നംഗ സംഘം സഞ്ചരിച്ച കാർ നാട്ടുകാർ തടഞ്ഞാണ് പോലീസിനെ ഏൽപ്പിച്ചത്. കേസിലെ പ്രതികളിൽ ഒരാൾക്ക് കോവിഡ് രോഗം ഉണ്ടെന്ന് തെളിഞ്ഞതോടെ സി ഐ ഉൾപ്പടെ 34 പേർ നിരീക്ഷണത്തിലായി. ജയിലിലേക്ക് മാറ്റുന്നതിന് തൊട്ട് മുമ്പ് നടത്തിയ പരിശോധനയിലാണ് പ്രതിയ്ക്ക് രോഗം സ്ഥിരീകരിച്ചത്.