സിനിമ-സീരിയൽ-നാടക നടന്‍ കലാശാല ബാബു ഓർമ്മയായിട്ട് രണ്ടു വർഷം. പ്രശസ്​ത കഥകളി ആചാര്യൻ കലാമണ്ഡലം കൃഷ്ണന്‍ നായരുടെയും മോഹിനിയാട്ട നര്‍ത്തകി കലാമണ്ഡലം കല്ല്യാണി കുട്ടിയമ്മയുടെയും മകനായി 1955 ലാണ്​ ജനനം. സഹതാരമായും വില്ലനായും തിളങ്ങിയ കലാശാല ബാബു നാടക വേദികളിലൂടെയാണ് ശ്രദ്ധേയനായത്. പിന്നീടാണ് അദ്ദേഹത്തിന് സിനിമയിലേക്ക്  അവസരങ്ങള്‍ ലഭിക്കുന്നത്. 

കോളേജ് വിദ്യാഭ്യാസ കാലഘട്ടത്തില്‍ റേഡിയോ നാടകങ്ങളിലൂടെയാണ് കലാരംഗത്തേക്ക് കടക്കുന്നത്. പിന്നീട് രണ്ട് വര്‍ഷം കാളിദാസ കലാകേന്ദ്രത്തില്‍ നാടകനടനായി. ഒ.മാധവ​ന്റെയും  കെ.ടി.മുഹമ്മദി​ന്റെയും സഹപ്രവര്‍ത്തകനായിരുന്നു. ജോണ്‍ പോളി​ന്റെ ഇണയേത്തേടി  എന്ന സിനിമയിലാണ് കലാശാല ബാബു ആദ്യമായി അഭിനയിച്ചത്. തുടര്‍ന്ന് അദ്ദേഹം തൃപ്പൂണിത്തുറയില്‍ സ്വന്തം നിലയില്‍ കലാശാല എന്ന നാടക ട്രൂപ്പിന് നേതൃത്വം നല്‍കി. ഈ നാടകസംഘത്തി​​ന്റെ പേരാണ്​ പിന്നീട്​ സ്വന്തം പേരിനൊപ്പം ചേർത്തത്​.

ക്യൂൻ, വിശ്വവിഖ്യാതമായ മൂക്ക്​, താങ്ക്യു വെരിമച്ച്​, പോളേട്ട​​ന്റെ വീട്​, ഒപ്പം, ടു കൺട്രീസ്​, രാസലീല, മുല്ലമൊട്ടും മുന്തിരിച്ചാറും, ചേകവർ, പുതിയമുഖം, റൺവേ, ബാലേട്ടൻ, പച്ചക്കുതിര, ചെസ്സ്​, അവൻ ചാണ്ടിയു​ടെ മകൻ, കനക സിംഹാസനം, തുറുപ്പു ഗുലാൻ, തൊമ്മനും മക്കളും, കസ്​തൂരിമാൻ, എ​​ന്റെ വീട്​ അപ്പൂ​​ന്റേം തുടങ്ങി നിരവധി ചിത്രങ്ങളിൽ അഭിനയിച്ചിട്ടുണ്ട്​. 28 ഓളം സീരിയലുകളിലും അഭിനയിച്ചു.