കൂടുതൽ തമിഴ്​ ചിത്രങ്ങൾ ഓൺലൈൻ റിലീസിങ്ങിന്​ ഒരുങ്ങുന്നതായി റിപ്പോർട്ടുകൾ.
ലോക്​ഡൗൺ കഴിഞ്ഞാലും സിനിമാ മേഖല സജീവമാകാൻ കുറഞ്ഞത്​ സെപ്​തംബർ വരെയെങ്കിലുമെടുക്കും എന്ന കണക്കുകൂട്ടലി​ന്റെ പശ്ചാത്തലത്തിലാണ് ചില നിർമാതാക്കൾ പുതിയ തീരുമാനവുമായി മുന്നോട്ട്​ വന്നത്. എന്നാൽ സൂപ്പർ താരങ്ങളുടെ ചിത്രങ്ങൾ  ഇത്തരത്തിൽ ഹോട്​സ്റ്റാർ, ആമസോൺ, നെറ്റ്​ഫ്ലിക്​സ്​ പോലുള്ള ഒാൺലൈൻ പ്ലാറ്റ്​ഫോമുകളിൽ റിലീസ്​ ചെയ്യില്ലെന്നാണ് സൂചന. ചെറു ബജറ്റ്​ ചിത്രങ്ങളാണ്​ ഒ.ടി.ടി റിലീസിങ്​ പരിഗണനയിൽ ഉള്ളത്​.

നേരത്തെ, നടൻ സൂര്യയുടെ ഭാര്യയുമായ ജ്യോതികയുടെ ഏറ്റവും പുതിയ ചിത്രം ‘പൊൻ മകൾ വന്താൽ’ ലോക്​ഡൗണിനെ തുടർന്ന്​ ആമസോൺ പ്രൈമിൽ റിലീസിങ്ങിന് ഒരുങ്ങുന്നുവെന്ന വാർത്ത തിയേറ്ററുടമകൾക്കിടയിൽ വലിയ വിവാദത്തിന്  തിരികൊളുത്തിയിരുന്നു. സൂര്യയുടെ സിനിമകൾ ബഹിഷ്​കരിക്കുമെന്ന് തിയേറ്റർ ഉടമകൾ  തീരുമാനമെടുത്തിരുന്നു. ഇതിനുപിന്നാലെയാണ് 
കൂടുതൽ തമിഴ്​ ചിത്രങ്ങൾ ഓൺലൈൻ റിലീസിങ്ങിന് ഒരുങ്ങുന്നു എന്ന വാർത്ത തിയേറ്റർ ഉടമകളെ വെട്ടിലാക്കിയിരിക്കുന്നത്.