ലോക്ക്ഡൗൺ പ്രഖ്യാപിച്ചതിനെ തുടർന്ന് ഭക്ഷണം വിതരണം ചെയ്തു സിനിമാ പ്രവർത്തകരുടെ കൂട്ടായ്മ. കൊച്ചി നഗരസഭാ പരിധിയിൽ കടത്തിണ്ണയിലായാലും ഫ്ലാറ്റുകളിലായാലും ആരും പട്ടിണി കിടക്കാൻ പാടില്ലെന്ന ചിന്തയുമായാണ്  സിനിമാ പ്രവർത്തകരുടെ കൂട്ടായ്മ  ഭക്ഷണം വിതരണം ചെയ്യുന്നത്.  
' കൊവിഡ് - 19 കൂട്ടായ്മ കിച്ചൻ ' എന്ന പേരിൽ നിർമ്മാതാക്കളായ ആന്റോ ജോസഫ് , മഹാ സുബൈർ , ആഷിഖ് ഉസ്മാൻ , മനു , നടൻ ജോജു ജോർജ് , പ്രൊഡക്ഷൻ കൺട്രോളർ ബാദുഷ എന്നിവരാണ് കൂട്ടായ്മയുടെ പിന്നിലുള്ളവർ. ആവശ്യക്കാർക്ക് കൊച്ചി കോർപ്പറേഷൻ പരിധിയിൽ എവിടെയായാലും ഭക്ഷണം എത്തിക്കുകയാണ് രീതി .  ഉച്ചയ്ക്കും രാത്രിയിലും വിതരണം ഉണ്ടാകും. മാർച്ച് 27 നാണ്  ഭക്ഷണ വിതരണത്തിന് തുടക്കമിട്ടത്.  ആദ്യദിനം 250 , രണ്ടാം ദിനം 350 , മൂന്നാംദിനം 400 പേർക്കുവീതം ഭക്ഷണം വിതരണം ചെയ്തു . വ്യാഴാഴ്ച 1200 പേർക്കാണ് ഭക്ഷണം നൽകിയത് . നിർമ്മാതാവ് മഹാ സുബൈറിന്റെ തറവാട് വീട്ടിൽ കുടുംബാംഗങ്ങൾ ഉൾപ്പെടെയാണ് ഭക്ഷണം പാചകം ചെയ്യുന്നത് .