കോവിഡ് ഭീതിയിൽ ലോക്ക് ഡൗൺ പ്രഖ്യാപിച്ചതിന്റെ പശ്ചാത്തലത്തിൽ ഷൂട്ടിങ് നിലച്ചതോടെ പ്രതിസന്ധിയിലായ സിനിമാപ്രവര്‍ത്തകര്‍ക്ക് സഹായവുമായി സാങ്കേതികവിദഗ്ധരുടെ കൂട്ടായിമയായ  ഫെഫ്ക്ക മുന്നോട്ടു വച്ച പദ്ധതിയിലേക്ക് മോഹന്‍ലാല്‍ 10 ലക്ഷം രൂപയും മഞ്ജു വാരിയർ അഞ്ചുലക്ഷം രൂപയും നല്‍കി. 

തെലുങ്ക് നടന്‍ അല്ലു അര്‍ജുനും സഹായം നൽകുമെന്ന് അറിയിച്ചിട്ടുണ്ട്. ''സിനിമയിലുള്ള ഒരുപാടുപേര്‍ ഈ ഘട്ടത്തില്‍ സാമ്പത്തികബുദ്ധിമുട്ട് അനുഭവിക്കുന്നുണ്ട്. അവരെ സഹായിക്കേണ്ടത് നമ്മുടെ കടമയാണ്. വരുംദിവസങ്ങളില്‍ കൂടുതല്‍ സിനിമാപ്രവര്‍ത്തകര്‍ സഹായവുമായി മുന്നോട്ടുവരുമെന്നാണ് പ്രതീക്ഷ'' എന്നും മഞ്ജുവാരിയര്‍ പറഞ്ഞു.

ഷൂട്ടിങ് നിലച്ച ചെറിയ ചിത്രങ്ങളില്‍ കുറഞ്ഞ വേതനത്തിന് ജോലി ചെയ്‌തിരുന്ന സാങ്കേതികപ്രവര്‍ത്തരെയും പദ്ധതിയില്‍പ്പെടുത്തും. അര്‍ഹരായവരുടെ പട്ടിക തയ്യാറാക്കാന്‍ ഫെഫ്ക്കയിലെ 19 സംഘടനാ ഭാരവാഹികളോടും നിര്‍ദേശിച്ചിട്ടുണ്ടെന്ന് ജനറല്‍ സെക്രട്ടറി ബി. ഉണ്ണികൃഷ്‌ണൻ അറിയിച്ചു. 

ദിവസവേതനക്കാരായ സിനിമാപ്രവര്‍ത്തകര്‍ക്ക് വരുംമാസങ്ങളില്‍ ആകും സാമ്പത്തികസഹായം നൽകുക.ഏകദേശം അയ്യായിരത്തോളംപേര്‍ക്ക് ആണ് ഇത് ഒരു വലിയതോതിൽ പ്രയോജനപ്പെടുക.കൊറോണ ശമിച്ചാലും ഷൂട്ടിങ്ങുകള്‍ പുനരാരംഭിക്കാന്‍ മൂന്നുമാസമെങ്കിലും എടുക്കുമെന്നാണ് നിലവിലെ വിലയിരുത്തല്‍.