ലോകമെമ്പാടും ഉത്സവാഘോഷത്തോടെ റീലീസ് ചെയ്ത ദർബാറിന്റെ വ്യാജപ്പതിപ്പ് പുറത്തിറങ്ങി. ടൊറന്റോയിൽ നിന്നാണ് വ്യാജപ്പതിപ്പ് ഇറങ്ങിയിരിക്കുന്നത്. വൻബഡ്ജറ്റ് ചിത്രമായ ദർബാറിന്റെ വ്യാജപ്പതിപ്പിറങ്ങിയത് നിർമ്മാതാക്കളെ നടുക്കിയിരിക്കുകയാണ്. 

അമേരിക്കയിലും ഇം​ഗ്ളണ്ടിലും രജനീചിത്രങ്ങൾക്ക് ആരാധകരേറെയുണ്ട്. അതിനിടയിൽ വ്യാജപ്പതിപ്പിറങ്ങിയിരിക്കുന്നത് അവിടത്തെ വിപണികളിൽ ചിത്രത്തെ ബാധിക്കും. എത്ര സുരക്ഷിതമാക്കി സിനിമ ഇറക്കിയാലും വ്യാജപ്പതിപ്പിറങ്ങുന്ന അന്താരാഷ്ട്രാമാഫിയ സജീവമാണ്. 
ഇവർക്കെതിരെ ചെറുവിരലനക്കാൻ പോലും ഇതുവരെ അന്വേഷണസംഘത്തിന് കഴിഞ്ഞിട്ടില്ല. അടുത്തിടെ മമ്മൂട്ടിയുടെ ബി​ഗ്ബഡ്ജറ്റ് ചിത്രമായ മാമാങ്കത്തിന്റെ വ്യാജപ്പതിപ്പ് ഇറങ്ങിയിരുന്നു.ഇതിന്റെ കേന്ദ്രവും ടൊറന്റോയാണെന്ന് കണ്ടെത്തി.  മധുരരാജ, ലൂസിഫർ എന്നീ ചിത്രങ്ങളുടെ വ്യാജപ്പതിപ്പുകളും ഇറങ്ങിയിട്ടുണ്ട്.
തമിഴ്, മലയാളം, തെലുങ്ക് ചിത്രങ്ങൾക്ക് ലോകമെമ്പാടും വിപണിയുണ്ട്.  എങ്കിൽ മാത്രമേ ബി​ഗ് ബഡ്ജറ്റ് ചിത്രങ്ങൾക്ക് മുതൽമുടക്കും ലാഭവും ഉണ്ടാക്കാൻ സാധിക്കുകയുള്ളൂ. കേരളത്തിൽ വേണ്ട രീതിയിൽ കളക്ഷൻ നേടാത്ത മാമാങ്കം മുടക്കുമുതൽ തിരിച്ചുപിടിച്ചത് മറ്റ് രാജ്യങ്ങളിലെ കളക്ഷൻ കൊണ്ടാണ്. ലോകമെമ്പാടും റിലീസ് ചെയ്ത ഈ ചിത്രം 200 കോടി ക്ളബിലെത്തി നിർമ്മാതാവിനെ രക്ഷിച്ചു. 
ദർബാറിന്റെ മുടക്കുമുതൽ 300 കോടിക്ക് മുകളിലാണ്. നടീനടന്മാരുടെയും ടെക്നീഷ്യന്മാരുടെയും പ്രതിഫലത്തിന് പുറമേയാണിത്. ചിത്രം സമ്മിശ്രപ്രതികരണമാണ് ഉണ്ടാക്കിയിരിക്കുന്നത്. ഈ സാഹചര്യത്തിലാണ് വ്യാജപ്പതിപ്പിറങ്ങിയിരിക്കുന്നത്.