നാടക, സിനിമ നടി കോഴിക്കോട് ശാരദ (80) അന്തരിച്ചു. ശ്വാസതടസത്തെ തുടർന്ന് മെഡിക്കൽ കോളജ് ആശുപത്രിയിൽ ചികിത്സയിലായിരുന്നു. നാടകത്തിൽ അഭിനയിച്ച് കൊണ്ടിരിക്കെ നിലമ്പൂർ ബാലൻ സംവിധാനം ചെയ്ത 'അന്യരുടെ ഭൂമി'യിലൂടെയാണ് സിനിമയിൽ എത്തിയത്.1985 മുതൽ ചലച്ചിത്ര രംഗത്ത് സജീവമായ ശാരദ സയാമീസ് ഇരട്ടകൾ, അമ്മക്കിളിക്കൂട്, ചേരി, കിളിച്ചുണ്ടൻ മാമ്പഴം, സല്ലാപം, നന്ദനം, യുഗപുരുഷൻ, കുട്ടിസ്രാങ്ക്. എന്നിവയുൾപ്പെടെ എഴുപതിലേറെ ചിത്രങ്ങളിൽ അഭിനയിച്ചിട്ടുണ്ട്. സിനിമകൾ കൂടാതെ ടെലിവിഷൻ സീരിയലുകളിലും ശാരദ സജീവമായിരുന്നു.