ന്യുമോണിയ ബാധയെ തുടർന്ന് വിഖ്യാത നടൻ നസറുദ്ദീൻ ഷാ ആശുപത്രിയിൽ. മുംബൈയിലെ ഖാർ ഹിന്ദുജ ആശുപത്രിയിലാണ് 70 കാരനായ നടനെ പ്രവേശിപ്പിച്ചത്. അഭിനേത്രി കൂടിയായ ഭാര്യ രത്‌ന പഥക്കാണ് രോഗവിവരം പുറത്തുവിട്ടത്. ശ്വാസകോശത്തിലെ ന്യുമോണിയ ബാധ കൂടിയിരുന്നു. എന്നാൽ അദ്ദേഹത്തിന്റെ ആരോഗ്യ നില മെച്ചപ്പെട്ടിട്ടുണ്ടെന്നും ഉടൻ ആശുപത്രി വിടാനാകുമെന്നാണ് പ്രതീക്ഷിക്കുന്നതെന്നും അവർ പറഞ്ഞു.

ദേശീയ പുരസ്‌കാരം ഉൾപ്പെടെ നിരവധി അംഗീകാരങ്ങൾ സ്വന്തമാക്കിയ അഭിനേതാവാണ് നസറുദ്ദീൻ ഷാ. 2020 ൽ പുറത്തിറങ്ങിയ മീ രക്സമാണ് ഒടുവിൽ ഇറങ്ങിയ ചിത്രം. ആമസോൺ പ്രൈം വീഡിയോ സീരീസായ ബാൻഡിഷ് ബാൻഡിറ്റ്‌സിലും അദ്ദേഹം അഭിനയിച്ചിരുന്നു. ദ്രുവ് ലാതർ സംവിധാനം ചെയ്യുന്ന മാരീച് എന്ന ചിത്രമാണ് പുറത്തിറങ്ങാനിരിക്കുന്നത്. റിലീസ് ചെയ്യാനിരിക്കുന്ന ദി മിനിയേച്ചറിസ്റ്റ് ഓഫ് ജുണഗഡ് എന്ന ചിത്രത്തിലും അദ്ദേഹം പ്രധാന വേഷം ചെയ്തിട്ടുണ്ട്.