മലയാളത്തിൽ ബോക്സ് ഓഫീസിൽ റെക്കോർഡുകൾ തിരുത്തിയഴുതിയ ചിത്രമാണ് ലൂസിഫർ. പൃഥ്വിരാജിന്റെ ആദ്യ സംവിധാന സംരംഭമായ സിനിമയിൽ മോഹൻലാലാണ് നായകനായത്. മുരളി ഗോപിയുടേതായിരുന്നു തിരക്കഥ. 

വലിയ പ്രേക്ഷക സ്വീകാര്യത നേടിയ ചിത്രം ഇപ്പോൾ തെലുങ്കിലേക്കും എത്തുന്നുവെന്നാണ് റിപ്പോർട്ടുകൾ. പൃഥ്വിരാജ് തന്നെയാണ് ചിത്രം തെലുങ്കിലേക്കും എത്തുന്നുവെന്ന് സൂചിപ്പിച്ചത്. സൂപ്പർ താരം ചിരഞ്ജീവിയാണ് ചിത്രത്തിന്റെ തെലുങ്കിലെ റീ മെയ്‌ക്ക് അവകാശം സ്വന്തമാക്കിയിരിക്കുന്നത്. ചിരഞ്ജീവി തന്നെയാകും ചിത്രത്തിൽ നായകനാകുക. ചിത്രത്തിന്റെ റീമെയ്ക് അവകാശം, സൂപ്പർ താരം നേടിയ വാർത്ത പൃഥ്വിരാജ് ട്വിറ്ററിൽ സ്ഥിരീകരിച്ചു. ചിരഞ്ജീവിക്കൊപ്പമുള്ള ഫോട്ടോയും പൃഥ്വിരാജ് സമൂഹമാധ്യമത്തിൽ പങ്കുവെച്ചിട്ടുണ്ട്.