സംസ്ഥാനത്തെ തിയേറ്ററുകളിൽ ഇന്നു മുതൽ സെക്കൻഡ് ഷോ പുനഃരാരംഭിച്ചേക്കും. കൊവിഡിനെ തുടർന്ന് ഒരു വർഷത്തോളം അടച്ചിട്ട തിയേറ്ററുകൾ നേരത്തെ തുറന്നിരുന്നു. എന്നാൽ നിയന്ത്രണങ്ങളുടെ ഭാഗമായി പ്രദർശന സമയം പകൽ 9 മുതൽ രാത്രി 9 വരെ ആക്കിയിരിന്നു. ഈ നിയന്ത്രണം നീക്കണമെന്നാവശ്യപ്പെട്ട് കൊവിഡ് കോർ കമ്മിറ്റി സർക്കാരിന് ശിപാർശ നൽകി. ഇതുപ്രകാരമുള്ള ഉത്തരവ് ഇന്ന് പുറത്തിറങ്ങുമെന്നാണ് പ്രതീക്ഷിക്കുന്നത്.പ്രദർശനം വീണ്ടും ആരംഭിച്ചപ്പോൾ കാര്യമായ വരുമാനം കണ്ടെത്താൻ തിയേറ്റർ ഉടമകൾക്കോ നിർമാതാക്കൾക്കോ സാധിക്കാതിരുന്നതിനാൽ സെക്കൻഡ് ഷോ വേണമെന്ന ആവശ്യവുമായി ഫിലിം ചേംബർ ഭാരവാഹികൾ രംഗത്തെത്തിയിരുന്നു. ചീഫ് സെക്രട്ടറിയുമായി ഫിലിം ചേംബർ ഭാരവാഹികൾ നടത്തിയ ചർച്ചയിൽ വിഷയം അനുഭാവപൂർവം പരിഗണിക്കാമെന്ന് ഉറപ്പ് ലഭിച്ചിരുന്നു.പകൽ 12 മണി മുതൽ രാത്രി 12 മണിവരെയാകും സിനിമാ പ്രദർശനത്തിന് അനുമതി നൽകുക. ഇപ്പോൾ ഏകദേശം 30 സിനിമകളുടെ റിലീസ് മാറ്റി വച്ചിരിക്കുകയാണ്.