എ.ഐ.വൈ.എഫ്. സംസ്ഥാന ജോയിന്റ് സെക്രട്ടറി എൻ. അരുൺ വാളയാർ കേസ് പ്രമേയമാക്കി സിനിമ ഒരുക്കുന്നു. സ്ത്രീകൾക്കും കുട്ടികൾക്കും എതിരെയുള്ള അതിക്രമങ്ങളും രാഷ്ട്രീയവും ചർച്ച ചെയ്യുന്ന ചിത്രമാണ് അണിയറയിൽ ഒരുങ്ങുന്നതെന്ന് അരുൺ വ്യക്തമാക്കി. സാക്ഷര സമൂഹമെന്ന് അഭിമാനിക്കുന്ന കേരളത്തിൽപ്പോലും സ്ത്രീകൾക്കും കുട്ടികൾക്കും എതിരായ അതിക്രമങ്ങൾ വർദ്ധിച്ചുവരുന്നത് ഗൗരവത്തോടെ കാണണമെന്നും അരുൺ കൂട്ടിച്ചേർത്തു.

മലയാളത്തിലെ പ്രമുഖ താരങ്ങൾക്കൊപ്പം ആദിവാസി വിഭാഗത്തിൽ നിന്നുള്ളവരും ചിത്രത്തിൽ പ്രധാന കഥാപാത്രങ്ങളായി എത്തും. കേസിൽ പുനർവിചാരണ നടക്കുന്ന സമയമായതിനാൽ സിനിമയുടെ മറ്റ് വിവരങ്ങൾ ഇപ്പോൾ പുറത്തുവിടുന്നില്ലെന്നും അദ്ദേഹം പറഞ്ഞു. നിയമസഭാ തെരഞ്ഞെടുപ്പിന് ശേഷമാകും ചിത്രീകരണം ആരംഭിക്കുക. പൗരത്വ നിയമ ഭേദഗതിയുടെ പശ്ചാത്തലത്തിൽ അരുൺ രചനയും സംവിധാനവും നിർവഹിച്ച ‘അവകാശികൾ’ എന്ന ചിത്രം ഫെബ്രുവരി അവസാനം തീയേറ്ററുകളിൽ എത്തും.