സിനിമാ ചിത്രീകരണത്തിനിടെ നടൻ ടൊവീനോ തോമസിന് പരിക്കേറ്റു. രോഹിത് ബി.എസ്. സംവിധാനം നിർവഹിക്കുന്ന 'കള' എന്ന പുതിയ സിനിമയ്ക്കായുള്ള സംഘട്ടന രംഗം ചിത്രീകരണത്തിനിടയ്ക്കാണ് താരത്തിന് പരിക്കേറ്റിരിക്കുന്നത്.

രണ്ട് ദിവസം മുൻപ് പിറവത്തെ സെറ്റിൽ വെച്ചാണ് സംഭവം നടക്കുന്നത്. പരിക്കേറ്റതിനെ തുടർന്ന് ഉടൻ തന്നെ കൊച്ചിയിലെ സ്വകാര്യ ആശുപത്രിയിൽ പ്രവേശിപ്പിച്ചു. എന്നാൽ ആന്തരിക രക്തസ്രാവമുള്ളതായി കണ്ടെത്തിയതിനെ തുടർന്ന് ടൊവീനോ ഐസിയുവിൽ നിരീക്ഷണത്തിലാണ്. ചിത്രീകരിക്കുന്നതിനിടെ വയറിന് ചവിട്ടേറ്റതാണ് പരിക്കിന് കാരണമെന്നാണ് സൂചന. കടുത്ത വയറുവേദനയെത്തുടർന്നാണ് ആശുപത്രിയിൽ പ്രവേശിപ്പിച്ചത്.