നടിയും മോഡലുമായ ​ഐശ്വര്യറായിക്കും മകൾ ആരാധ്യ ബച്ചനും കോവിഡ്​ ഭേദമായി. മുംബൈ നാനാവതി ആശുപത്രിയിൽ ചികിത്സയിലിരുന്ന ഇരുവരും കോവിഡ്​ നെഗറ്റീവ്​ ആയതിനെ തുടർന്ന്​ ആശുപത്രി വിട്ടു. അഭിഷേക് ബച്ചനാണ് ട്വിറ്ററിലൂടെ ഇക്കാര്യം ലോകത്തെ അറിയിച്ചത്.

താനും പിതാവ്​ അമിതാഭ്​ ബച്ചനും ചികിത്സയിൽ തുടരുകയാണെന്നും അഭിഷേക്​ ട്വിറ്ററിൽ കുറിച്ചു. ‘നിങ്ങളുടെ നിരന്തരമായ പ്രാർത്ഥനകൾക്കും ആശംസകൾക്കും നന്ദി. എല്ലാവരോടും എന്നന്നേക്കുമായി കടപ്പെട്ടിരിക്കുന്നു. ഐശ്വര്യയും ആരാധ്യയും കോവിഡ്​ ടെസ്​റ്റിൽ നെഗറ്റീവ്​ ആയതിനെ തുടർന്ന്​ ആശുപത്രി വിട്ടു. അവരിപ്പോൾ വീട്ടിലാണ്​. ഞാനും പിതാവും ആശുപത്രിയിൽ തുടരും’-അഭിഷേക്​ ട്വിറ്ററിൽ കുറിച്ചു.

ജൂലൈ പതിനൊന്നിനാണ് തനിക്ക് കോവിഡ് സ്ഥിരീകരിച്ച കാര്യം അമിതാഭ് ബച്ചൻ ട്വിറ്ററിലൂടെ അറിയിച്ചത്. പിറകെ അഭിഷേകും തനിക്ക് രോഗബാധ സ്ഥിരീകരിച്ചതായി സമൂഹമാധ്യമങ്ങളിലൂടെ അറിയിച്ചു. തുടർന്ന് ഐശ്വര്യയ്ക്കും ആരാധ്യയ്ക്കും രോഗം സ്ഥിരീകരിച്ചു. കോവിഡ് സ്ഥിരീകരിച്ച ശേഷം ഹോം ക്വാറന്റൈനിലായിരുന്നു ഐശ്വര്യയും ആരാധ്യയും. ജൂലൈ പതിനെട്ടിനാണ് ഇരുവരെയും നാനാവതി ആശുപത്രിയിൽ പ്രവേശിപ്പിച്ചത്.