ലോക ബാഡ്മിന്റൺ ചാമ്പ്യൻഷിപ്പിൽ ഇന്ത്യൻ താരം പി വി സിന്ധുവിന് കന്നിക്കിരീടം. ഫൈനലിൽ ജപ്പാൻ താരം നൊസോമി ഒകുഹാരയെ പരാജയപ്പെടുത്തിയാണ് പി വി സിന്ധു ചരിത്ര നേട്ടം കരസ്ഥമാക്കിയത്. ലോക ചാമ്പ്യൻഷിപ്പിൽ ഒരു ഇന്ത്യൻ താരത്തിന്റെ ആദ്യ കിരീടമാണിത്. മൂന്നാം സീഡായ ഒകുഹാരയെ ആധികാരികമായാണ് റാങ്കിങ്ങിൽ അഞ്ചാം സ്ഥാനത്തുള്ള സിന്ധു പരാജയപ്പെടുത്തിയത്. ആദ്യ രണ്ട് ഗെയിമുകളും അനായാസം കയ്യടക്കിയാണ് സിന്ധു ഇന്ത്യയുടെ യശസ്സ് ഉയർത്തിയത്. സ്കോർ 21 -7 , 21 -7 . ഫൈനലുകളിൽ കാലിടറുന്നു എന്ന വിമർശനത്തെ അപ്രസക്തമാക്കുന്ന ഉശിരൻ പ്രകടനമാണ് പി വി സിന്ധു കളിയിലുടനീളം പുറത്തെടുത്തത്. ലോക കിരീടം നേടിയ സിന്ധുവിനെ പ്രധാനമന്ത്രി നരേന്ദ്ര മോദി ഉൾപ്പടെയുള്ളവർ അനുമോദിച്ചു.