സംസ്ഥാനത്ത് ഓൺലൈൻ മദ്യവിതരണത്തിനുള്ള ടോക്കൺ സംവിധാനമായ ബെവ്ക്യൂ  ആപ്പിൽ ഇന്നും പ്രതിസന്ധി . രജിസ്ട്രേഷനുള്ള ഒടിപി കിട്ടാത്തതായിരുന്നു കഴിഞ്ഞ ദിവസം വരെയുള്ള പ്രശ്നം . എന്നാൽ രാത്രിയോടെ മൂന്ന് പുതിയ ഒടിപി സേവനദാതാക്കളെ കണ്ടെത്തി പ്രശ്നം പരിഹരിച്ചതായി കമ്പനി അറിയിച്ചെങ്കിലും ഇന്ന് വീണ്ടും ആപ്പ് സാങ്കേതിക പ്രശ്നം സൃഷ്ടിക്കുകയായിരുന്നു. രാവിലെ മദ്യം ബുക്ക് ചെയ്യാൻ ശ്രമിച്ച പലർക്കും ഒടിപി കിട്ടുകയോ രജിസ്ട്രേഷൻ പൂർത്തിയാക്കാനോ പറ്റിയില്ല . ഒൻപത് മണിക്ക് ശേഷം ബുക്ക് ചെയ്യാൻ ശ്രമിച്ചവർക്ക് പുലർച്ചെ 3.35 മുതൽ 9 വരെയുള്ള സമയത്തെ ബുക്കിംങ്ങേ  നടത്താനാവൂ എന്ന സന്ദേശമാണ് ലഭിച്ചത് . അതേസമയം ഇന്നത്തേക്ക് മദ്യം വാങ്ങാനായി 15 ലക്ഷത്തോളം പേർ ബുക്കിംഗ് നടത്തിയെന്നാണ് ഫെയർകോഡ് കമ്പനി അറിയിച്ചത് . ബാർകോഡ് പരിശോധിക്കാനുള്ള സംവിധാനം ലഭ്യമല്ലാത്തതിനാൽ പലയിടത്തും ഇന്ന് ബാർകോഡ് രേഖപ്പെടുത്തി മദ്യം നൽകുകയാണ് . സമയത്തിന് മദ്യം കിട്ടാതെ വന്നവർ ബഹളം വെച്ചതോടെ ഇന്നലെ വലിയ രീതിയിലുള്ള ആശയക്കുഴപ്പമാണ് മദ്യവിൽപന ശാലകളിലുണ്ടായത് . ഇത് പ്രതിഷേധത്തിന് വഴിവെക്കുകയും ചെയ്തിരുന്നു.