മുൻ‌കൂർ ജാമ്യാപേക്ഷയിൽ വിധി വരാനിരിക്കെ നമ്പർ 18 ഹോട്ടലുമായി ബന്ധപ്പെട്ട പോക്‌സോ കേസ് പ്രതി കോഴിക്കോട് സ്വദേശിനി അഞ്ജലി റീമദേവ് വീണ്ടും വിഡിയോയുമായി സമൂഹമാധ്യമങ്ങളിൽ. താൻ ആത്മഹത്യ ചെയ്യില്ലെന്നും മരിച്ചാൽ ഇത് മരണ മൊഴിയായി കണക്കാക്കണമെന്നുമാണ് അഞ്ജലി വീഡിയോയിൽ ആവശ്യപ്പെടുന്നത്. ആറ് പേർക്ക് എതിരെ ആണ് അഞ്ജലി ആരോപണങ്ങൾ ഉയർത്തിയിരിക്കുന്നത്,  ഇതിൽ രാഷ്ട്രീയക്കാരും സന്നദ്ധ പ്രവർത്തകർ, വ്യവസായികൾ ട്രസ്റ്റ് ഭാരവാഹികൾ എന്നിവരും ഉണ്ട്. ഇവരുടെ പേര് ക്യാമറയുടെ മുന്നിൽ പറയുന്നില്ല പക്ഷെ എത്തിക്കേണ്ടഅടുത്ത് എത്തിച്ചിട്ടുണ്ട് എന്ന് അഞ്ജലി പറയുന്നു.

‘കുറച്ചു ദിവസമായി സമൂഹത്തിലെ ഏറ്റവും മോശപ്പെട്ട സ്ത്രീ എന്ന് എന്നെ ചിത്രീകരിച്ചുകൊണ്ടിരിക്കുകയാണ്. ഇതിനു കാരണം ഒരു സ്ത്രീ ഉന്നയിച്ചിട്ടുള്ള ആരോപണങ്ങൾ മാത്രമാണ്. ബോയ് ഫ്രണ്ടില്ലാത്തവർക്കു ബോയ് ഫ്രണ്ടിനെ കൊടുക്കും, കാവൽ നിൽക്കും, അവർ നേരിട്ടു കണ്ടിട്ടുണ്ട്, ബിപി ഗുളിക എന്നു പറഞ്ഞു മെഡിസിൻ ബോക്സിൽ പഞ്ഞി വച്ചു കൊണ്ടു നടന്നു, കൂടിയ ലഹരി ഉപയോഗിക്കുന്നതു കണ്ടിട്ടുണ്ട്. സ്ത്രീകളുമായി മറ്റു രീതിയിലുള്ള ബന്ധമുണ്ട്, നമ്പർ 18 ഹോട്ടലിൽവെച്ച് എന്തോ കാഴ്ച കണ്ടു, ഞാൻ ലഹരി ഉപയോഗിക്കുന്നത് നേരിട്ടു കണ്ടു എന്നെല്ലാമുള്ള ആരോപണങ്ങളാണ് പരാതിക്കാരി ഉയർത്തിയിരിക്കുന്നത്.

കടുത്ത മാനസിക സമ്മർദ്ദം അനുഭവിക്കുകയാണ്. ആത്മഹത്യ ചെയ്യുന്നതിനെ കുറിച്ച് ആലോചിച്ചു. അനിയന്റെ മുഖം ഓർമ വരും. അവന്റെ മുന്നിലെങ്കിലും സത്യം തെളിയിക്കണം. എനിക്ക് എതിരെ പരാതി നൽകിയത് രണ്ടു പേര് ആണ്. മറ്റു പെൺകുട്ടികളുടെ മൊഴിയെടുക്കണം. വർഷങ്ങളായി കൂടെ ജോലി ചെയ്തവരോടു ചോദിക്കണം. കൂടെ ജോലി ചെയ്ത എല്ലാവരുടെയും വിവരങ്ങൾ പരിശോധിച്ചുനോക്കണം. ആ സ്ത്രീ ഉന്നയിച്ച കാര്യങ്ങൾ തെളിയിക്കാൻ ലൈവ് പോളിഗ്രാഫ് ടെസ്റ്റെടുക്കണം. ആരോപണങ്ങൾ ശെരിയായി തീർന്നാൽ കല്ലെറിഞ്ഞു കൊല്ലണം.

എനിക്കെതിരായി കളിച്ചു കൊണ്ടിരിക്കുന്നവരുടെ വിവരങ്ങൾ എത്തിക്കേണ്ടിടത്ത് എത്തിച്ചിട്ടുണ്ട്. എനിക്കെതിരെ മീറ്റിങ്ങും ഗൂഢാലോചനകളും ഇപ്പോഴും നടത്തുന്നുണ്ട്. ഞാൻ മരിച്ചു പോയാലും ഇങ്ങനെ ആക്കിയവരെ നിയമവും കോടതിയും വെറുതെ വിടരുത്. ഇനി ഒരിക്കലും ഒരു പെൺകുട്ടിയുടെ ജീവിതവും തുലയ്ക്കാൻ പാടില്ല. ഇപ്പോൾ പിടിച്ചു നിൽക്കുന്നത് തെറ്റു ചെയ്തിട്ടില്ല എന്ന ഒറ്റ ധൈര്യത്തിലാണ്. ആരെങ്കിലും തന്നെ കൊന്നാൽ ഈ ആറു വ്യക്തികൾക്കെതിരെ അന്വേഷണം വരണമെന്നും റീമ വീഡിയോയിൽ പറയുന്നു.

തന്നെ നമ്പർ 18 ഹോട്ടൽ വിഷയവുമായി ബന്ധപ്പെട്ട് കൂട്ടിക്കുഴയ്ക്കുന്നത് എന്തിനാണെന്ന് അറിയില്ല. റോയിയെ പെടുത്താനാണ് പലരും ശ്രമിക്കുന്നത്. അവരോട് എന്തെങ്കിലും പ്രശ്നമുണ്ടെങ്കിൽ എന്തിനാണ് തന്നെ അതിലേക്കു വലിച്ചിഴയ്ക്കുന്നത് എന്ന് അഞ്ജലി ചോദിക്കുന്നു. ചെയ്തതാണെങ്കിൽ ചെയ്തു എന്നു പറയാൻ ധൈര്യമുണ്ട്. ആരോപണം ഉന്നയിച്ചവർ പറഞ്ഞത് സത്യമല്ല എന്നു തെളിഞ്ഞാൽ ജീവനോടെ ഇല്ലെങ്കിലും എന്തായിരുന്നു അവരുടെ അജൻഡ എന്നതു പുറത്തു കൊണ്ടുവന്നു ശിക്ഷ സമൂഹവും കോടതിയും നേടി കൊടുക്കണം’ – അഞ്ജലി വിഡിയോയിൽ പറയുന്നു.