സംസ്ഥാനത്ത് മഴക്കെടുതിയിൽ മരിച്ചവരുടെ എണ്ണം 23 ആയി. കോട്ടയത്ത് 14 പേരും ഇടുക്കിയിൽ 9 പേരുമാണ് മരിച്ചത്. ഉരുൾപൊട്ടലുണ്ടായ കോട്ടയം കൂട്ടിക്കലിൽ നിന്ന് ആകെ 12 മൃതദേഹങ്ങൾ കണ്ടെത്തി. 3 പേരെ കൂടി ഇവിടെ കണ്ടെത്താനുണ്ട്.ഇന്ന് ഒൻപത് മൃതദേഹങ്ങളാണ് കണ്ടെടുത്തത്. മൂന്നുപേരുടെ മൃതദേഹം ഇന്നലെ കണ്ടെത്തിയിരുന്നു. കാവാലിയിൽ ഉരുൾപൊട്ടലിൽപ്പെട്ട 2 പേരുടെ മൃതദേഹങ്ങളും കണ്ടെത്തിയിട്ടുണ്ട്.ഇടുക്കിയിലെ കൊക്കയാറിലെ ഉരുൾപൊട്ടൽ നടന്ന സ്ഥലത്തുനിന്നും 6 മൃതദേഹങ്ങൾ രക്ഷാപ്രവർത്തകർ കണ്ടെത്തി. നിലവിൽ 2 മൃതദേഹങ്ങൾ കൂടി കണ്ടെത്താനുണ്ടെന്നാണ് അധികൃതർ നൽകുന്ന വിവരം. ഇതിൽ മൂന്ന് വയസുകാരനും ഉൾപ്പെടുന്നുണ്ട്. ഇവർക്കായുളള തിരച്ചിൽ തുടരുകയാണ്.ജില്ലയിൽ മറ്റ് മൂന്ന് പേർ ഒഴുക്കിൽപ്പെട്ടാണ് മരിച്ചത്. ഇവരുടെ മൃതദേഹങ്ങളും കണ്ടെത്തിയിട്ടുണ്ട്. നാല് മന്ത്രിമാരുടെ നേതൃത്വത്തിലാണ് വിവിധ ജില്ലകളിൽ രക്ഷാപ്രവർത്തനം നടക്കുന്നത്.