സോളാർ കേസിൽ പരാതിക്കാരിയുടെ മൊഴി സിബിഐ രേഖപ്പെടുത്തുന്നു. സോളാർ തട്ടിപ്പ് കേസും ലൈംഗിക പീഡന പരാതികളും അന്വേഷിക്കുന്ന സിബിഐ സംഘമാണ് മൊഴി രേഖപ്പെടുത്തുന്നത്. തിരുവനന്തപുരം സിബിഐ ഓഫീസിലാണ് മൊഴിയെടുപ്പ്. കോൺഗ്രസ് നേതാവ് കെ.സി.വേണുഗോപാലിനെതിരായ പീഡനപരാതിയാണ് സിബിഐ പ്രധാനമായും അന്വേഷിക്കുന്നത്.വേണുഗോപാലിനെ കൂടാതെ കോൺഗ്രസ് നേതാക്കളായ ഹൈബി ഈഡൻ, പി.സി.വിഷ്‌ണുനാഥ്, ബിജെപി നേതാവ് അബ്ദുള്ളകുട്ടി എന്നിവർക്കെതിരെയും പരാതി ഉന്നയിച്ചിട്ടുണ്ട്. ഇക്കാര്യത്തിൽ വിശദമായ മൊഴി പരാതിക്കാരിയിൽ നിന്ന് ശേഖരിക്കാനാണ് സിബിഐ ശ്രമം. ഇതു കൂടാതെ സോളാർ തട്ടിപ്പിന് പിന്നിലെ സാമ്പത്തിക ഇടപാടുകളും സിബിഐ അന്വേഷണത്തിൻറെ പരിധിയിൽ വരുന്നുണ്ട്. ഈ വിഷയങ്ങളിലും സിബിഐ വിശദമായ മൊഴി രേഖപ്പെടുത്തും.