തെരഞ്ഞെടുപ്പ് സമയത്ത് നൽകിയ വാക്ക് പാലിക്കാനൊരുങ്ങി നടനും എംപിയുമായ സുരേഷ് ഗോപി. തെരഞ്ഞെടുപ്പ് സമയത്ത് ശക്തൻ മാർക്കറ്റിന്റെ വികസനത്തിന് ഫണ്ട് അനുവദിക്കുമെന്ന് അദ്ദേഹം വാഗ്ദാനം നൽകിയിരുന്നു. കോർപ്പറേഷൻ പദ്ധതി സമർപ്പിച്ചാൽ ഉടൻ ഫണ്ട് അനുവദിക്കുമെന്ന് സുരേഷ് ഗോപി അറിയിച്ചു. എല്ലാ തരത്തിലുള്ള ആധുനിക സൗകര്യങ്ങളോടു കൂടിയ ഒരു സമുച്ചയമാണ് എംപി ഫണ്ട് ഉപയോഗിച്ച് ലക്ഷ്യമിടുന്നത്. 2022 ഏപ്രിൽ മാസത്തോടെ പണി പൂർത്തിയാക്കി ഉദ്ഘാടനം നിർവ്വഹിക്കാൻ സാധിക്കും. തൃശൂർ കോർപ്പറേഷൻ പദ്ധതി സമർപ്പിച്ചാൽ ഉടൻ ഫണ്ട് അനുവദിക്കാനാകുമെന്ന് അദ്ദേഹം വ്യക്തമാക്കി.

നാളികേര വികസന ബോർഡിന്റെ പദ്ധതി അവണിശ്ശേരി പഞ്ചായത്തിൽ നടപ്പാക്കുന്നതിന്റെ ചർച്ചകൾക്കിടെയാണ് ശക്തൻ മാർക്കറ്റിന്റെ വികസനത്തിന് ഒരു കോടി രൂപ അനുവദിക്കുന്ന കാര്യം ബിജെപി ജില്ലാ നേതാക്കളെ സുരേഷ് ഗോപി അറിയിച്ചത്.