രവിപിള്ള ഫൗണ്ടേഷൻ പ്രഖ്യാപിച്ച കാരുണ്യസ്പർശം ധനസഹായ പദ്ധതിയുടെ വിതരണോദ്ഘാടനം മുഖ്യമന്ത്രി പിണറായി വിജയൻ നിർവഹിച്ചു. സെക്രട്ടേറിയറ്റിൽ നടന്ന ചടങ്ങിൽ എട്ടുപേർക്ക് ധനസഹായം കൈമാറി. രവിപിള്ള ഫൗണ്ടേഷന്റെയും ആർ.പി. ഗ്രൂപ്പിന്റെയും ചെയർമാൻ ഡോ. ബി.രവിപിള്ളയുടെ സാന്നിധ്യത്തിലായിരുന്നു ചടങ്ങ്.15,000 പേർക്ക് ഈമാസം സഹായം നൽകുമെന്നും സെപ്റ്റംബർ, ഒക്ടോബർ മാസങ്ങളിലായി ബാക്കിയുള്ളവർക്കുകൂടി ധനസഹായം വിതരണം ചെയ്യുമെന്നും ഡോ. രവിപിള്ള പറഞ്ഞു. ധനലക്ഷ്മി ബാങ്ക് വഴിയാണ് ധനസഹായം വിതരണംചെയ്യുന്നത്

നോർക്ക നിർദേശിച്ച രണ്ടുപേർക്കും ആർ.പി.ഫൗണ്ടേഷൻ തിരഞ്ഞെടുത്ത ആറുപേർക്കുമാണ് വിതരണോദ്ഘാടനത്തിന്റെ ഭാഗമായി സഹായം നൽകിയത്. 15 കോടിയുടെ സഹായമാണ് ആദ്യഘട്ടത്തിൽ പ്രഖ്യാപിച്ചതെങ്കിലും പ്രതീക്ഷിച്ചതിനെക്കാൾ കൂടുതൽ അപേക്ഷകൾ ലഭിച്ചതിനാൽ 17 കോടി വിതരണം ചെയ്യാനാണ് തീരുമാനം.