വ്യാപാര സ്ഥാപനങ്ങളിൽ പരിശോധന കർശനമാക്കുന്നു. കൊവിഡ് വ്യാപനം കൂടുന്നതും, ഓണക്കാലത്തെ തിരക്കും കണക്കിലെടുത്താണ് ജില്ലാ കലക്ടർമാർക്ക് നിർദേശം നൽകിയിരിക്കുന്നത്. കൊവിഡ് മാനദണ്ഡവും സാമൂഹിക അകലവും കൃത്യമായി പാലിക്കുന്നുണ്ടോ എന്നാണ് പരിശോധിക്കുക. വരും ദിവസങ്ങളിൽ കൊവിഡ് വ്യാപനം വർധിക്കാൻ സാധ്യതയുണ്ടെന്ന റിപ്പോർട്ടിൻറെ അടിസ്ഥാനത്തിലാണ് നിർദേശം.

ജില്ലാ അധികൃതർക്ക് പുറമേ പൊലീസിനോടും പരിശോധന വർധിപ്പിക്കാൻ സർക്കാർ ആവശ്യപ്പെട്ടിട്ടുണ്ട്. അതേസമയം, പരിശോധനയുടെ പേരിൽ വ്യാപാരികളെയും ജനങ്ങളെയും ബുദ്ധിമുട്ടിക്കരുതെന്നും പ്രത്യേകം നിർദേശം നൽകിയിട്ടുണ്ട്. അതേസമയം പ്രതിവാര രോഗനിരക്ക് (ഐപിആർ) അടിസ്ഥാനമാക്കി തദ്ദേശസ്ഥാപനങ്ങളിൽ ഏർപ്പെടുത്തിയ ട്രിപ്പിൾ ലോക്ഡൗൺ സംബന്ധിച്ച കൂടുതൽ തീരുമാനങ്ങൾ ബുധനാഴ്ച എടുക്കും.