കൊല്ലം ശാസ്താംകോട്ടയില്‍ നവവധുവിനെ ഭര്‍തൃവീട്ടില്‍ തൂങ്ങി മരിച്ച നിലയില്‍ കണ്ടെത്തി. കുണ്ടറ പേരയം സ്വദേശിനി ധന്യയാണ് മരിച്ചത്. സംഭവത്തില്‍ യുവതിയുടെ ഭര്‍ത്താവ് രാജേഷിനെ പൊലീസ് കസ്റ്റഡിയിലെടുത്തു. കഴിഞ്ഞ ഏപ്രില്‍ മാസമായിരുന്നു ശാസ്താംകോട്ട കുന്നത്തൂര്‍ സ്വദേശി രാജേഷിന്റെയും ധന്യയുടേയും വിവാഹം നടന്നത്. രണ്ട് മതവിഭാഗത്തില്‍പ്പെട്ടവരായിരുന്നതിനാല്‍ ചില കുടുംബ പ്രശ്‌നങ്ങളും തുടക്കത്തില്‍ നിലനിന്നിരുന്നു. വിവാഹ ശേഷം രാജേഷിന്റെ കുന്നത്തൂര്‍ വീട്ടിലായിരുന്നു യുവതി താമസിച്ചിരുന്നത്.

മൂന്ന് മാസം മുമ്പായിരുന്നു ഇരുവരുടേയും വിവാഹം.എന്നാല്‍ ഭര്‍ത്താവിന്റെ മദ്യപാനത്തെച്ചൊല്ലി ഇരുവര്‍ക്കുമിടയില്‍ കലഹം പതിവായിരുന്നു. ടിപ്പര്‍ ലോറി ഡ്രൈവറാണ് രാജേഷ്. കഴിഞ്ഞ ദിവസവും മദ്യപിച്ചെത്തിയ രാജേഷ് യുവതിയുമായി വഴക്കിട്ടു എന്നാണ് പൊലീസ് പറയുന്നത്. എന്നാല്‍ താന്‍ ഉറങ്ങി എണീറ്റപ്പോള്‍ കിടപ്പുമുറിയുടെ ജനാലയില്‍ തൂങ്ങി നില്‍ക്കുന്ന ധന്യയേയാണ് കണ്ടതെന്നാണ് രാജേഷിന്റെ മൊഴി.