മദ്രാസ് ഐഐടി ക്യാമ്പസിനുള്ളിൽ മൃതദേഹം കത്തിക്കരിഞ്ഞ നിലയിൽ കണ്ടെത്തി. മലയാളിയായ പ്രോജക്ട് അസോസിയേറ്റ് ഉണ്ണിക്കൃഷ്ണൻ നായരുടേതാണ് മൃതദേഹമെന്ന് പൊലീസ് കണ്ടെത്തി. വ്യാഴാഴ്ച വൈകിട്ട് 6 മണിയോടെയാണ് ക്യാമ്പസിനുള്ളിലെ ഹോക്കി ഗ്രൗണ്ടിന് സമീപത്തുനിന്ന് വിദ്യാർഥികൾ മൃതദേഹം കണ്ടെത്തിയത്. പാതി കത്തിയ നിലയിലായിരുന്നു മൃതദേഹം.കൊവിഡ് വ്യാപനത്തെ തുടർന്ന് ക്യാമ്പസ് അടച്ചിട്ടിരിക്കുകയായിരുന്നു. ഓൺലൈൻ ക്ലാസ് മാത്രമാണ് നടത്തിയിരുന്നത്. ഈ സാഹചര്യത്തിൽ ഉണ്ണികൃഷ്‌ണൻ എന്തിന് ക്യാമ്പസിൽ എത്തിയെന്നതടക്കമുള്ള കാര്യങ്ങൾ കോട്ടൂർപുരം പൊലീസ് അന്വേഷിക്കും.2021 ഏപ്രിലിലാണ് ഉണ്ണികൃഷ്‌ണൻ ഐഐടിയിൽ ചേർന്നത്. മൃതദേഹം പോസ്റ്റ്‌മോർട്ടത്തിനായി രായപേട്ട ഗവൺമെൻറ് ആശുപത്രിയിലേയ്ക്ക് മാറ്റി. അസ്വാഭാവിക മരണത്തിനാണ് പൊലീസ് കേസെടുത്തിരിക്കുന്നത്.