മധ്യപ്രദേശ് തലസ്ഥാനമായ ഭോപ്പാലിൽ ഗണേശ വിഗ്രഹ നിമഞ്ജന ചടങ്ങിനിടെ ബോട്ട് മുങ്ങി 11 പേർ മരിച്ചു. 18 പേർ കയറിയ ബോട്ടാണ് അപകടത്തിൽ പെട്ടത്. കാണാതായവർക്കുള്ള തിരച്ചിൽ തുടരുകയാണ്. ആറു പേരെ രക്ഷപെടുത്തിയതായി പോലീസ് അറിയിച്ചു. രണ്ടു ബോട്ടുകൾ കൂട്ടിക്കെട്ടിയാണ്  നിമഞ്ജന ചടങ്ങിനായി പുറപ്പെട്ടത്. ബോട്ടിൽ ഉണ്ടായിരുന്നവർ ആരും ലൈഫ് ജാക്കറ്റ് ധരിച്ചിരുന്നില്ല. 11 പേരുടെ മൃതദേഹങ്ങൾ ദുരന്ത പ്രതികരണ സേന കണ്ടെടുത്തു. നിർഭാഗ്യകരമായ സംഭവമാണ് നടന്നതെന്ന് മധ്യപ്രദേശ് നിയമ മന്ത്രി പി സി ശർമ പ്രതികരിച്ചു. അപകടത്തിൽ മരിച്ചവരുടെ കുടുംബങ്ങൾക്ക് നാല് ലക്ഷം രൂപ വീതം നൽകുമെന്നും അദ്ദേഹം അറിയിച്ചു.