മലയാളികളുടെ തനിമയേറുന്ന രുചി എന്നും വാഴയിലയിൽ പൊതിഞ്ഞ ചോറും കൂട്ടാനും ആകുന്നു. ആ പൊതി ചോറിന്റെ മണം ഇന്നും മലയാളികൾക്ക് പ്രിയമുള്ള ഓർമയാണ്. ഇലയടയും ഇലയിൽ പൊള്ളിച്ച കരിമീനുമെല്ലാം കേരളത്തിൻ്റെ തനതു വിഭങ്ങളാണെന്നതിൽ യാതൊരു സംശയവുമില്ല.വാഴയിലയാൽ ഭക്ഷണം ഉണ്ടാക്കുന്നതു കൊണ്ടും കഴിക്കുന്നതു കൊണ്ടുമുള്ള ആരോഗ്യഗുണങ്ങൾ ഏറെയാണ്. ദഹിക്കാൻ പ്രയാസമായതു കൊണ്ടാണ് വാഴയിലയെ ഭക്ഷണമായി ഉൾപ്പെടുത്താൻ കഴിയാത്തത്. വാഴയിലയിൽ ഭക്ഷണം കഴിക്കുമ്പോൾ അതിൽ അടങ്ങിയിട്ടുള്ള പോളി ഫിനോളുകളെ ആഗിരണം ചെയ്യുന്നു. ഇങ്ങനെ ഇലയിലെ പോഷകങ്ങളെല്ലാം നമുക്ക് ലഭിക്കുകയുണ്ടാകും. 

വാഴയിലയ്ക്ക് ആന്റി ബാക്ടീരിയൽ ഗുണങ്ങളും ഏറെയാണ്. ഇലയിലെ  എപ്പിഗാലോകറ്റേച്ചിൻഗാലേറ്റ് (EGCG) പോലുള്ള സംയുക്തങ്ങൾ ഫ്രീ റാഡിക്കലുകളോട് പൊരുതി നിരവധി രോഗങ്ങളിൽ നിന്നും സംരക്ഷിക്കുന്നു.  ഭക്ഷണത്തിലെ അണുക്കളെ നശിപ്പിച്ച് രോഗസാധ്യത കുറയ്ക്കാൻ ഇതുവഴി ഏറെ  സാധിക്കും. വാഴയിലയിൽ ചൂടുള്ള ഭക്ഷണം വിളമ്പുമ്പോൾ അതിലെ മെഴുക് ഉരുകുകയും അതിന്റെ ഗന്ധം ഭക്ഷണത്തിനു ലഭിക്കുകയും ചെയ്യും. അതിനാൽ ഭക്ഷണത്തിന് രുചി വർദ്ധിക്കാനും ഇത് കാരണമാകുന്നു.