ആദ്യം കയ്ക്കുകയും പിന്നീട് മധുരിക്കുകയും ചെയ്യുന്ന നെല്ലിക്ക പല രോ​ഗങ്ങളിൽ നിന്നും വിമുക്തി നൽകുന്നു. ആയുർവേദ മരുന്നുകളിൽ നെല്ലിക്ക പ്രധാന ചേരുവയാണ്. പോഷക​ഗുണങ്ങളോടൊപ്പം ഔഷധമൂല്യവും നെല്ലിക്കയ്ക്ക് ഉണ്ട്. നെല്ലിക്കയിൽ അടങ്ങിയിട്ടുള്ള ​ഗാലിക് ആസിഡും ​ഗലോട്ടാനിനും പ്രമേഹം തടയാൻ സഹായിക്കുന്നു. 

നെല്ലിക്കയിലെ ആന്റി ഓക്സിഡന്റുകളും ആന്റി മ്യൂട്ടേജനുകളും കാൻസറിനെ പ്രതിരോധിക്കുന്നു. കാൻസർ സെല്ലുകളുടെ വളർച്ച തടയാൻ ഇവയ്ക്ക് കഴിവുണ്ട്.
ദഹനം എളുപ്പമാക്കാനും കാഴ്ചശക്തി കൂട്ടുവാനുമുള്ള കഴിവ് നെല്ലിക്കയ്ക്കുണ്ട്. അകാലവാർദ്ധക്യത്തെ പ്രതിരോ​ധിക്കാനും രോ​ഗപ്രതിരോധശേഷി കൂട്ടുവാനും നെല്ലിക്ക കഴിക്കുന്നതിലൂടെ സാധിക്കുന്നു.
തലമുടിയുടെ ആരോ​ഗ്യത്തിനും സൗന്ദര്യത്തിനും നെല്ലിക്ക നല്ലതാണ്. ഉണങ്ങിയ നെല്ലിക്കയിട്ട് കാച്ചിയെടുത്ത വെളിച്ചെണ്ണ തേച്ചാൽ താരൻ, മുടിക്കായ, പേൻ എന്നിവ മാറും. മാത്രമല്ല മുടി സമൃദ്ധിയായി വളരുകയും ചെയ്യും. ആയുർവേദ എണ്ണയായ നീലിഭൃം​ഗാദിയിലെ മുഖ്യ ചേരുവയും നെല്ലിക്കയാണ്.

ശ്രദ്ധിക്കേണ്ടത്

​ഗർഭിണികളും കുട്ടികളും അമിതമായി നെല്ലിക്ക കഴിക്കുന്നത് വയറിളക്കത്തിന് കാരണമാകും. പ്രമേഹത്തിന് മരുന്നുകഴിക്കുന്നവർ നെല്ലിക്ക കൂടുതലായി കഴിച്ചാൽ രക്തത്തിലെ പഞ്ചസാര ക്രമാതീതമാം വിധം താഴാനുള്ള സാധ്യത കൂടുതലാണ്.