മലയാള പത്ര-പുസ്തക പ്രസാധനം ചെലവ് കുറഞ്ഞതാക്കാനുള്ള കർമ്മപരിപാടിക്ക് രൂപം നൽകാൻ കേരള മീഡിയ അക്കാദമി നാളെ പ്രസാധന സ്വാശ്രയത്വ ഉച്ചകോടി സംഘടിപ്പിക്കുന്നു. നവംബർ 1 ന് ഉച്ചകോടി അവസാനിക്കും. മസ്കറ്റ് ഹോട്ടലിലാണ് ഉച്ചകോടി നടക്കുന്നത്. സ്വതന്ത്ര ‍ഡിസൈൻ സോഫ്റ്റ് വെയറായ സ്ക്രൈബസ് അറബിഭാഷയ്ക്കും ഇന്ത്യൻ ഭാഷകൾക്കും ഉപയോ​ഗിക്കാനായി വികസിപ്പിച്ചെടുത്തതിനു നേതൃത്വം കൊടുത്ത ഒമാൻ വിദ​ഗ്ധൻ ഫഹദ് അൽ സെയ്ദി നാളെ 10 മണിക്ക് പരിപാടി ഉദ്ഘാടനം ചെയ്യും. സ്വതന്ത്ര സോഫ്റ്റ് വെയർ ഉദ്യമങ്ങളുടെ ഉദ്ഘാടനം മന്ത്രി തോമസ് ഐസക് നിർവ്വഹിക്കും. നവംബർ 1 ന് സമാപനസമ്മേളനം മന്ത്രി കടന്നപ്പള്ളി രാമചന്ദ്രൻ ഉദ്ഘാടനം ചെയ്യുമെന്ന് മീഡിയ അക്കാദമി ചെയർമാൻ ആർ. എസ്. ബാബു പറ‍ഞ്ഞു.