ടെസ്റ്റ് ക്രിക്കറ്റിൽ ഏറ്റവും കൂടുതൽ വിക്കറ്റെടുത്തിട്ടുള്ള ഇന്ത്യൻ ബോളർമാരിൽ മൂന്നാം സ്ഥാനത്തെത്തി സ്പിന്നർ ആർ അശ്വിൻ. ന്യൂസിലൻഡിനെതിരായ ഒന്നാം ടെസ്റ്റിൻെറ അഞ്ചാം ദിനം ഓപ്പണർ ടോം ലഥാമിൻെറ വിക്കറ്റെടുത്തതോടെയാണ് അശ്വിൻ റെക്കോർഡ് നേട്ടം കൈവരിച്ചത്. മുൻ താരം ഹർഭജൻ സിങിനെ മറികടന്നാണ് അശ്വിൻ മൂന്നാം സ്ഥാനത്തെത്തിയത്. നാലാം ദിനം വിൽ യങിനെ പുറത്താക്കിയപ്പോൾ 417 വിക്കറ്റുമായി ഹർഭജൻറെ നേട്ടത്തിനൊപ്പമെത്തിയിരുന്നു.

കരിയറിലിത് വരെ 30 തവണ അശ്വിൻ ടെസ്റ്റിൽ അഞ്ച് വിക്കറ്റ് നേട്ടം കൈവരിച്ചിട്ടുണ്ട്. നിലവിൽ 418 വിക്കറ്റുകളാണ് അശ്വിൻെറ പേരിലുള്ളത്. ഇതിഹാസ താരങ്ങളായ കപിൽ ദേവും അനിൽ കുംബ്ലെയുമാണ് വിക്കറ്റ് വേട്ടയിൽ അശ്വിന് മുന്നിലുള്ളത്. 131 മത്സരങ്ങളിൽ നിന്ന് 434 വിക്കറ്റുകളാണ് മുൻനായകനായ കപിൽ ദേവ് നേടിയിട്ടുള്ളത്. കപിലിനെയും അശ്വിൻ വൈകാതെ മറികടക്കാനാണ് സാധ്യത.

എന്നാൽ അനിൽ കുംബ്ലെയെ മറികടക്കുകയെന്നത് അത്ര എളുപ്പമാവില്ല. 132 ടെസ്റ്റ് മത്സരങ്ങളിൽ നിന്ന് കുംബ്ലെ 619 വിക്കറ്റുകൾ വീഴ്ത്തിയിട്ടുണ്ട്. കാൺപൂർ ടെസ്റ്റിൻെറ ഒന്നാം ഇന്നിങ്സിൽ അശ്വിൻ മൂന്ന് വിക്കറ്റുകളാണ് വീഴ്ത്തിയത്. അക്സർ പട്ടേൽ 5 വിക്കറ്റുകൾ വീഴ്ത്തിയിരുന്നു. മത്സരത്തിൽ ഇന്ത്യ വിജയത്തിന് അരികിലാണ്. അവസാന സെഷനിൽ 5 വിക്കറ്റുകൾ വീഴ്ത്തിയാൽ ഇന്ത്യക്ക് മത്സരം ജയിക്കാനാവും.