ദു:ഖവെള്ളി ദിനത്തില്‍ യേശുവിനെ അനുസ്മരിച്ച് പ്രധാനമന്ത്രി നരേന്ദ്രമോദി. മറ്റുള്ളവരെ സേവിക്കുന്നതിനായി തന്റെ ജീവിതം സമര്‍പ്പിച്ച യേശുദേവനെ ഈ ദിനത്തില്‍ എല്ലാവരും സ്മരിക്കണമെന്ന് പ്രധാനമന്ത്രി ട്വിറ്ററില്‍ കുറിച്ചു.
യേശു മറ്റുള്ളവരെ സേവിക്കുന്നതിനായി തന്റെ ജീവിതം സമര്‍പ്പിച്ചു. അദ്ദേഹത്തിന്റെ ധൈര്യവും നീതിബോധവും എന്നും വേറിട്ടു നില്‍ക്കുന്നുവെന്ന് പ്രധാനമന്ത്രി പറഞ്ഞു. ദു:ഖവെള്ളിയായ ഇന്ന് ക്രിസ്തു ദേവന്റെ ത്യാഗത്തെയും സത്യത്തോടും നീതിയോടും സേവനത്തോടുമുള്ള പ്രതിജ്ഞാബന്ധതയെയും നാം ഓര്‍ക്കണമെന്നും പ്രധാനമന്ത്രി ട്വിറ്ററില്‍ കുറിച്ചു. ക്രൈസ്തവര്‍ക്ക് ഏറെ പ്രധാന്യമുള്ള ദു:ഖവെള്ളി ക്രിസ്തുവിന്റെ കുരിശുമരണത്തിന്റെ ഓര്‍മ്മ പുതുക്കലാണ്.

അതേസമയം കൊറോണ വൈറസ് വ്യാപനത്തിന്റെ പശ്ചാത്തലത്തിൽ ചടങ്ങുകൾ ചുരുക്കി ലോകമെമ്പാടുമുള്ള ക്രൈസ്തവർ ഇന്ന് ദുഃഖവെള്ളി ആചരിക്കുന്നു. സമ്പർക്ക വിലക്കുള്ളതിനാൽ വിശ്വാസികൾ വീട്ടിലിരിക്കുമ്പോൾ വൈദികർ മാത്രമാണ് തിരുക്കർമ്മങ്ങളിൽ പങ്കാളികളായത്. വൈദികരും സഹായികളും ഉൾപ്പെടെ പരമാവധി അഞ്ച് പേരെ പങ്കെടുപ്പിച്ചുകൊണ്ടാണ് കേരളത്തിലുടനീളമുള്ള പള്ളികളിൽ ദുഃഖവെള്ളിയുടെ ശുശ്രൂഷകൾ നടന്നത്.