പ്രതിപക്ഷ നേതാവ് വിഡി സതീശനെ രൂക്ഷമായ ഭാഷയിൽ വിമർശിച്ച് എൻഎസ്‌എസ് സംസ്ഥാന അധ്യക്ഷൻ ജി സുകുമാരൻ നായർ. തൽസ്ഥാനം ഉറപ്പായി എന്നറിഞ്ഞപ്പോൾ മുതൽ വിഡി സതീശൻ മത-സാമുദായിക സംഘടനകളെ നിലവാരം കുറഞ്ഞ ഭാഷയിൽ വിമർശിക്കുകയാണ്. ഈ രാജ്യത്തെ ഒരു ദേശീയ പാർട്ടി എന്ന നിലയിൽ കോൺഗ്രസിൻറെ പാരമ്പര്യം അതാണോ എന്ന് നേതൃത്വം വിലയിരുത്തണമെന്ന് സുകുമാരൻ നായർ പറഞ്ഞു.രാജ്യത്തെ എല്ലാ മത-സാമുദായിക വിഭാഗങ്ങളെയും സംഘടനകളെയും ചേർത്തുനിർത്തിയ പാർട്ടിയാണ് കോൺഗ്രസ്. പാർട്ടിയുടെ നയപരമായ നിലപാടുകൾ വ്യക്തമാക്കേണ്ടത് പ്രതിപക്ഷ നേതാവല്ല കെപിസിസിയാണെന്നും സുകുമാരൻ നായർ പ്രസ്‌താവനയിൽ വ്യക്തമാക്കി. രാഷ്ട്രീയ പാർട്ടികളുടെ പ്രവർത്തനങ്ങൾ വിലയിരുത്താനും അഭിപ്രായം പറയാനുമുള്ള അവകാശം വ്യക്തികൾക്കുള്ളതുപോലെ മത-സാമുദായിക സംഘടനകൾക്കും ഉണ്ടെന്ന് രാഷ്ട്രീയനേതൃത്വങ്ങൾ മനസിലാക്കണമെന്നും അദ്ദേഹം കൂട്ടിച്ചേർത്തു.