പെണ്ണിനെ പോലെ ഇരിക്കുന്നുവെന്നും ട്രാൻസ്ജണ്ടർ ആണെന്നും കൂട്ടുകാർ കളിയാക്കിയതിൽ മനംനൊന്ത് ആൺ കുട്ടി ആത്മഹത്യ ചെയ്തു. ഉത്തർപ്രദേശിലെ ബെയർലി ജില്ലയിലാണ് സംഭവം. കൂട്ടുകാർ ശരീര ഘടനയെ ചൊല്ലി കളിയാക്കിയതിന് ശേഷം 16 വയസുകാരനായ കുട്ടി വീട്ടിൽ തൂങ്ങിമരിക്കുകയായിരുന്നു. താൻ മരിക്കുന്നതിനുള്ള കാരണം അച്ഛനും അമ്മയും അറിയുവനായി ആത്മഹത്യാ കുറിപ്പും എഴുതിവെച്ചു കൊണ്ടാണ് കൗമാരക്കാരൻ തൂങ്ങിമരിച്ചത്. 

എനിക്കൊരു നല്ല മകനാകാൻ സാധിച്ചില്ലെന്നും സ്ത്രീകളുടെ ശരീര പ്രകൃതം ആണ് എനിക്ക് ഉണ്ടായിരുന്നതെന്നും എനിക്ക് തന്നെ ഞാൻ ഇപ്പോൾ ഒരു ട്രാൻസ് ജണ്ടർ ആണോ എന്ന് സംശയം തോന്നുന്നുവെന്നും പറഞ്ഞുകൊണ്ട് ഹൃദയഭേദകമായ ആത്മഹത്യാകുറിപ്പ് എഴുതിവെച്ചുകൊണ്ടാണ് ഈ കൗമാരക്കാരൻ യാത്രയായത്. തന്നോട് ക്ഷമിക്കണമെന്നും ഇനി ഈ വീട്ടിൽ ഒരു പെൺകുഞ്ഞ് പിറന്നാൽ അത് ഞാൻ ആണെന്ന് കരുതണമെന്നും പറഞ്ഞുകൊണ്ടാണ് ആത്മഹത്യ കുറിപ്പ് അവസാനിപ്പിക്കുന്നത്. സുശാന്ത് കുമാർ രാജ്പുതിനെ പോലൊരു വലിയ നടന് ആത്മഹത്യ ചെയ്യാൻ സാധിക്കുമെങ്കിൽ തനിക്കും സ്വയം ജീവനൊടുക്കാൻ കഴിയുമെന്ന് കുട്ടി മരിക്കുന്നതിന് തലേന്ന് പറഞ്ഞതായി കുട്ടിയുടെ സഹോദരൻ പോലീസിനെ അറിയിച്ചു.