എറണാകുളം കോലഞ്ചേരിയിൽ ക്വാറന്റൈൻ കേന്ദ്രമാകാൻ വേണ്ടി സർവ സജ്ജീകരണങ്ങളും ചെയ്ത വീട് അജ്ഞാതർ അടിച്ചുതകർത്തു. മുംബൈയിൽ നിന്നെത്തിയ യുവാവിനായി പ്രത്യേകം ക്വാറന്റൈൻ കേന്ദ്രമാക്കി സജ്ജീകരിച്ച വീട് രോഗവ്യാപന ഭീതിയോർത്ത് നാട്ടുകാർ അടിച്ച് തകർത്തതാകാമെന്നാണ് പോലീസിന്റെ നിഗമനം. യുവാവിന്റെ ബന്ധുക്കളുടെ പരാതിയിന്മേൽ പോലീസ് കേസെടുത്തിട്ടുണ്ട്. മുംബൈയിലെ ഒരു സ്വകാര്യ കമ്പനിയില്‍ ജോലി ചെയ്യുന്ന യുവാവ് നാട്ടിലെത്തുമ്പോള്‍ താമസിക്കാനാണ് നിലവിൽ ആൾതാമസം ഇല്ലാത്ത വീട് ബന്ധുക്കൾ സജ്ജീകരിച്ചത്. അതിർത്തി കടന്ന് യുവാവ് എത്തി ഈ വീട്ടിൽ താമസിക്കുന്നതിന് പരിസരവാസികൾക്ക് എതിർപ്പുണ്ടായിരുന്നുവെന്നാണ് ബന്ധുക്കൾ പറയുന്നത്. അക്രമണം നടത്തിയ സംഘം വീടിന്റെ ജനല്‍ച്ചില്ലുകള്‍ തകർക്കുകയും വീട്ടിലേക്കുള്ള വൈദ്യുതി ബന്ധം വിച്ഛേദിക്കുകയും ചെയ്തു. അക്രമികൾ ബള്‍ബുകളും ഇതര സാധനങ്ങളും ഊരി കിണറ്റിലിടുകയും ചെയ്തിട്ടുണ്ട്. വീട്ടിലെ സാധനസാമഗ്രികൾ നശിപ്പിക്കാൻ അക്രമികൾ ശ്രമിച്ചതായും പോലീസിന്റെ പ്രാഥമിക അന്വേഷണത്തിൽ കണ്ടെത്തി.