ആലപ്പുഴ അച്ചൻകോവിൽ ആറ്റിൽ കുളിക്കാനിറങ്ങിയ രണ്ട് യുവാക്കൾ മുങ്ങി മരിച്ചു. കായംകുളം സ്വദേശികളായ മുഹമ്മദ് അനസ്, ജിബിൻ തങ്കച്ചൻ എന്നിവരാണ് വൈകിട്ട് ഒഴിക്കിൽപെട്ട് മരിച്ചത്. മരിച്ച യുവാക്കളടക്കം നാലുപേരാണ് പുഴയിൽ കുളിക്കാനിറങ്ങിയത്. ഹരിപ്പാട് ആഞ്ഞിലിമൂട്ടിൽ പാലത്തിനു സമീപം കുളിച്ചുകൊണ്ടിരുന്നപ്പോൾ ഇരുവരും മുങ്ങിപോകുകയായിരുന്നുവെന്ന് സുഹൃത്തുക്കൾ പറയുന്നു. ഉടൻ തന്നെ ഇവരെ കരയ്ക്ക് കയറ്റി ആശുപത്രിയിൽ എത്തിച്ചപ്പോഴേക്കും രണ്ടുപേരും മരിച്ചിരുന്നു. മൃതദേഹങ്ങൾ ഹരിപ്പാട് താലൂക്ക് ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. യുവാക്കളെ രക്ഷിക്കാൻ നാട്ടുകാർ പരമാവധി ശ്രമിച്ചെങ്കിലും സാധിച്ചില്ലെന്ന് ദൃക്‌സാക്ഷികൾ പറയുന്നു.