അഞ്ചാം വിവാഹത്തിനൊരുങ്ങിയ വിവാഹത്തട്ടിപ്പ് വീരൻ പോലീസ് പിടിയിൽ. ആലപ്പുഴ ഹരിപ്പാടാണ് സംഭവം. കൊല്ലം മുഖത്തല സ്വാവദേശിയായ ഖാലിദ് കുട്ടി എന്നയാൾ അഞ്ചാം വിവാഹത്തിനായി ഒരുങ്ങുമ്പോഴാണ് നാലാം ഭാര്യ പോലീസുമായെത്തി ഇയാളെ അറസ്റ്റ് ചെയ്യിപ്പിച്ചത്. കരിയിലകുളങ്ങരയുള്ള യുവതിയെ അടുത്തയാഴ്ച വിവാഹം കഴിക്കാമെന്നേറ്റ ഇയാൾ കേരളത്തിന്റെ വിവിധഭാഗത്ത് നിന്നുള്ള പല പെൺകുട്ടികളെയും വഞ്ചിച്ചുവരികയായിരുന്നു. വിവിധ വിവാഹസൈറ്റുകൾ വഴിയാണ് ഇയാൾ പെൺകുട്ടികളും അവരുടെ വീട്ടുകാരുമായും ബന്ധപ്പെട്ടുകൊണ്ടിരുന്നത്. സാമ്പത്തികമായി പിന്നോക്കം നിൽക്കുന്ന പെൺകുട്ടികളെ ഇയാൾ തന്ത്രപൂർവം വലവീശിപിടിക്കുകയായിരുന്നു. മുൻപ് നാല് യുവതികളെ വഞ്ചിച്ചതായി ചോദ്യം ചെയ്യലിനിടെ ഇയാൾ തന്നെ പോലീസിനോട് വെളിപ്പെടുത്തി. കൊട്ടിയം സ്വദേശിയെയാണ് ഇയാൾ ആദ്യം വിവാഹം കഴിച്ചത്. പിന്നീട് പെരിന്തൽമണ്ണ, കോഴിക്കോട്, ചാവക്കാട് എന്നിവിടങ്ങളിൽ നിന്നും വിവാഹം ചെയ്തു. പല സ്ത്രീകളിൽ നിന്നും ഇയാൾ ആഭരണങ്ങളും പണവും തട്ടിയെടുത്തതായും പോലീസ് പറഞ്ഞു.  ചോദ്യം ചെയ്യലിനുശേഷം ഇയാളെ  തൃശൂർ വടക്കേക്കാട് പൊലീസിന് കൈമാറി.