സൈബർ സെൽ ഉദ്യോ​ഗസ്ഥരെന്ന പേരിൽ‌ പെൺകുട്ടികളെ ഭീഷണിപ്പെടുത്തി പണം തട്ടുന്ന സംഘം കൊച്ചി പൊലീസിന് തലവേദനയാകുന്നു. പെൺകുട്ടികളെയോ അവരുടെ മാതാപിതാക്കളെയോ വിളിച്ച്  പെൺകുട്ടിയുടെ ന​ഗ്നചിത്രം ഇന്റർനെറ്റിൽ പ്രചരിക്കുന്നുണ്ടെന്ന് പറയും. അത് നീക്കം ചെയ്യാൻ വൻതുക ആവശ്യപ്പെടും. ഇതാണ് ഈ സംഘത്തിന്റെ രീതി. അവിവാഹിതരായ പെൺകുട്ടികളെയാണ് സംഘം ലക്ഷ്യമിടുന്നത്.അതുകൊണ്ട് ഇക്കാര്യം പുറത്തുപറയാൻ മാതാപിതാക്കൾ മടിക്കുന്നു. ഇത്  ഈ സംഘത്തിന് കൂടുതൽ തട്ടിപ്പ് നടത്താനുള്ള അവസരം നൽകുന്നു. പൊലീസ് ഉദ്യോ​ഗസ്ഥന്റെ ബന്ധുവിനെ ബ്ളാക്ക് മെയിൽ ചെയ്യാൻ ശ്രമിച്ചതോടെയാണ് ഈ സംഘത്തെക്കുറിച്ചുള്ള വിവരം പൊലീസ് അറിഞ്ഞത്. ഇതേത്തുടർന്ന് കൊച്ചിപൊലീസിന് മാധ്യമങ്ങളിലൂടെ അറിയിപ്പ് കൊടുക്കേണ്ടി വന്നു. സംഘത്തിനായുള്ള തിരച്ചിൽ ആരംഭിച്ചതായി കൊച്ചി പൊലീസ് അറിയിച്ചു.