കൂടത്തായി കൊലപാതക പരമ്പരയിലെ ആദ്യ ഇര അന്നമ്മടീച്ചറെ കൊല്ലാൻ പ്രതി ജോളി വാങ്ങിയ ഡോ​ഗ്കിൽ എന്ന മാരകവിഷത്തിന്റെ പ്രസ്ക്രിപ്ഷൻ പൊലീസ് കണ്ടെത്തി. കോഴിക്കോട് ജില്ലാ മൃ​ഗാശുപത്രിയിലെ പഴയ രജിസ്ട്രറിൽ നിന്നാണ് പൊലീസ് പ്രിസ്ക്രിപ്ഷൻ കണ്ടെത്തിയത്. 

അസുഖം ബാധിച്ച പട്ടിയെ കൊല്ലാനെന്ന പേരിലാണ് ജോളി ഡോ​ഗ്കിൽ മൃ​ഗഡോക്ടറെ കണ്ട് പ്രിസ്ക്രിപ്ഷൻ  എഴുതി ചിന്താവളപ്പിനടുത്തുള്ള വളർത്തുമൃ​ഗങ്ങളുടെ മരുന്നുകൾ വിൽക്കുന്ന കടയിൽ നിന്നും വാങ്ങിയത്. ചിന്താവളപ്പിനടുത്തുള്ള കടയിൽ ജോളിയെ എത്തിച്ച് പൊലീസ് തെളിവെടുത്തു. 2002 കാലഘട്ടത്തിൽ  ഈ മരുന്ന് വിറ്റിരുന്നതായും പിന്നീട് സർക്കാർ മരുന്ന് നിരോധിച്ചതായും കടയുടമ മൊഴി നൽകി. ഡോ​ഗ്കിൽ ആട്ടിൻസൂപ്പിൽ കലക്കി കൊടുത്താണ് അന്നമ്മയെ കൊന്നതെന്ന് ജോളി  പൊലീസിനോട് പറഞ്ഞു.