കൈക്കൂലി വാങ്ങിയ ​ഗൈനക്കോളജിസ്റ്റിന് ശിക്ഷ. കൊല്ലം ജില്ലയിലെ കടയ്ക്കൽ ​ഗവർമെന്റ് ആശുപത്രിയിലെ മുൻ ജൂനിയർ ​ഗൈനക്കോളജിസ്റ്റായിരുന്ന റിനു അനസ് റാവുത്തറിനെയാണ് 2000 രൂപ കൈക്കൂലി വാങ്ങിയ കേസിൽ തിരുവനന്തപുരം വിജിലൻസ് കോടതി ശിക്ഷിച്ചത്. അഴിമതി നിരോധന നിയമപ്രകാരം പ്രതിയ്ക്ക് 3 വർഷം തടവും 50,000 രൂപ പിഴയും വിധിച്ചു.

 2011-നാണ് കേസിനാസ്പദമായ സംഭവം നടന്നത്. കൊല്ലം ജില്ലയിലെ ചിതറ സ്വദേശിയായ നിസ്സാറുദ്ദീന്റെ ഭാര്യ റസീനാ ബീബിയെ പ്രവസത്തിനായി കടയ്ക്കൽ ​ഗവ. ആശുപത്രിയിൽ പ്രവേശിപ്പിച്ചിരുന്നു. ഈ സമയം ജൂനിയർ ​ഗൈനക്കോളജിസ്റ്റായ റിനു സിസേറിയൻ നടത്തുന്നതിന് 2000 രൂപ കൈക്കൂലി ആവശ്യപ്പെടുകയും ആശുപത്രിക്ക് സമീപം പ്രൈവറ്റ് പ്രാക്ടീസ് നടത്തുന്ന റൂമിൽ വച്ച് നിസ്സാറുദ്ദീനിൽ നിന്നും 2000 രൂപ കൈക്കൂലി വാങ്ങുകയും ചെയ്തു. വിജിലൻസ് കൈക്കൂലി കയ്യോടെ പിടികൂടിയിരുന്നു.