കരമന ഉമാനിലത്തിലെ ദുരൂഹമരണങ്ങളിലും സ്വത്ത് തട്ടിപ്പിലും കാര്യസ്ഥൻ രവീന്ദ്രൻനായർക്ക് കുരുക്ക് മുറുകുന്നു.കുടുംബത്തിലെ അവസാന കണ്ണിയായ ജയമാധവൻനായർക്ക് മാനസികപ്രശ്നം ഉണ്ടായിരുന്നതായി നേരത്തെ രവീന്ദ്രൻനായർ പൊലീസിന് മൊഴി നൽകിയിരുന്നു. 2017-ൽ  കരമന പൊലീസ് സ്റ്റേഷനിലും 2018-ൽ ജില്ലാ ക്രൈംബ്രാഞ്ചിനും നൽകിയ മൊഴികളാണ് രവീന്ദ്രൻനായർക്ക് കുരുക്കായിരിക്കുന്നത്. ജയമാധവൻനായർക്ക് മാനസികപ്രശ്നമുണ്ടായിരുന്നതായും വഴുതക്കാടുള്ള മനശ്ശാസ്ത്രവിദ​ഗ്ധനായ ഡോ.സുബാഷിന്റെ ചികിത്സയിലായിരുന്നുവെന്നുമാണ് രവീന്ദ്രൻനായർ മൊഴി നൽകിയത്.

ഇതോടെ മാനസികപ്രശ്നമുള്ള ജയദേവൻനായർ എങ്ങനെ വിൽപത്രം തയ്യാറാക്കിയെന്ന ചോദ്യം ഉയരുന്നു. മാനസികപ്രശ്നമുള്ളയാളിൽ നിന്നും  എഴുതിവാങ്ങുന്ന വിൽപ്പത്രത്തിന് സാധുതയില്ല.  ജില്ലാകോടതി ജീവനക്കാരനായ രവീന്ദ്രൻനായർക്ക് ഈ നിയമവശമെല്ലാം അറിയാമായിരുന്നെന്നാണ് അന്വേഷണസംഘത്തിന്റെ വിലയിരുത്തൽ. അങ്ങനെയെങ്കിൽ വിൽപത്രമടക്കം വ്യാജമാണെന്ന് അന്വേഷണസംഘം സംശയിക്കുന്നു. ചുരുക്കത്തിൽ അന്വേഷണം രവീന്ദ്രൻനായരിലേയ്ക്ക് നീങ്ങുകയാണ്. രവീന്ദ്രൻനായരുടെ അടുത്ത സുഹൃത്തുക്കളും പൊലീസിന്റെ നിരീക്ഷണത്തിലാണ്