കൊലക്കേസ് പ്രതിയെ പിടിക്കാൻ ആൾദൈവത്തിൻറെ സഹായം തേടി മധ്യപ്രദേശ് പൊലീസ്. പൊലീസ് ഉദ്യോഗസ്ഥൻ ആൾദൈവത്തിൻറെ കാൽചുവട്ടിലിരുന്ന് സഹായം തേടുന്ന വീഡിയോ വൈറലായി. സംഭവം വിവാദമായത്തോടെ വീഴ്ച വരുത്തിയ ഉദ്യോഗസ്ഥരെ സസ്പെൻഡ് ചെയ്താണ് പൊലീസ് മുഖം രക്ഷിച്ചത്.

ഉത്തർപ്രദേശിലെ ഛത്തർപൂരിൽ 17 കാരി കൊല്ലപ്പെട്ട സംഭവത്തിലാണ് പ്രതിയെ പിടിക്കാൻ പൊലീസ് ആൾദൈവത്തിൻറെ സഹായം തേടിയത്. സ്വയം പ്രഖ്യാപിത ആൾദൈവം പണ്ടോഖർ സർക്കാരിൻറെ ആശ്രമത്തിലാണ് സഹായം തേടി പൊലീസെത്തിയത്. യൂണിഫോമിലുള്ള എഎസ്ഐ ആൾദൈവത്തിൻറെ കാൽചുവട്ടിലിരുന്ന് കേസിൻറെ വിവരങ്ങൾ കൈമാറി. തുടർന്ന് ആൾദൈവം പൊലീസ് സംശയിക്കുന്ന കുറേയാളുകളുടെ പേരുകൾ തിരിച്ചു പറഞ്ഞു. ഇതിൽ താൻ പരാമർശിക്കാത്ത ആളെ പിടിച്ചാൽ കേസ് തെളിയുമെന്ന പ്രവചനവും കക്ഷി നടത്തി. മുഖ്യപ്രതിയുടെ സ്ഥലവും ഇയാളെ പിടിക്കാതെ കേസ് തീരില്ലെന്ന ഉപദേശവും നൽകാനും ആൾദൈവം മറന്നില്ല.

നൂറു കണക്കിന് ആൾക്കാരെ സാക്ഷിയാക്കിയായിരുന്നു പൊലീസിൻറെ സഹായാഭ്യർഥന. ദൃശ്യങ്ങൾ സമൂഹ മാധ്യമങ്ങളിൽ വൈറലായതോടെ പൊലീസിനെതിരെ രൂക്ഷ വിമർശനമുയർന്നു. സഹായം തേടി ആൾദൈവത്തിൻറെ കാൽചുവട്ടിൽ പോയ എഎസ്ഐയെയും സ്റ്റേഷൻ ചുമതലയുള്ള എസ്ഐയെയും ഉടനടി സസ്പെൻഡ് ചെയ്താണ് പൊലീസ് മുഖം രക്ഷിച്ചത്.

ജൂലൈ 28 നാണ് 17 കാരിയെ കിണറ്റിൽ മരിച്ച നിലയിൽ കണ്ടെത്തിയത്. ഈ കേസ് തെളിയിക്കാനായിരുന്ന പൊലീസിൻറെ സഹായാഭ്യർഥന. പെൺകുട്ടിയുടെ കുടുംബത്തിൻറെ പരാതിയെ തുടർന്ന് 302-ാം വകുപ്പ് പ്രകാരം കേസെടുത്ത പൊലീസ് മൂന്ന് പേരെ കസ്റ്റഡിയിലെടുത്തിരുന്നു. എന്നാൽ പിന്നീട് തെളിവുകളുടെ അഭാവത്തിൽ ഇവരെ വിട്ടയച്ചു. പിന്നീട് പെൺകുട്ടിയുടെ അമ്മാവനെ പൊലീസ് അറസ്റ്റ് ചെയ്തു. പെൺകുട്ടിക്ക് ആരുമായോ ബന്ധമുണ്ടെന്ന് സംശയിച്ച ഇയാൾ കൊലപ്പെടുത്തി കിണറ്റിൽ ഉപേക്ഷിക്കുകയായിരുന്നു എന്നാണ് പൊലീസ് പറയുന്നത്. സംഭവത്തിൽ അന്വേഷണം നടന്ന് വരികയാണെന്ന് പൊലീസ് അറിയിച്ചു.