യൂട്യൂബ് നോക്കി ഗർഭഛിദ്രം നടത്താൻ ശ്രമിച്ച യുവതി ഗുരുതരാവസ്ഥയിൽ. 25കാരിയാണ് ​ഗുരുതരാവസ്ഥയിൽ ആശുപത്രിയിലായിരിക്കുന്നത്.നാഗ്പൂരിലെ യശോദര നഗറിൽ വ്യാഴാഴ്ചയാണ് സംഭവം. 2016 മുതൽ വിവാഹ വാഗ്ദാനം നൽകി യുവാവ് തന്നെ പീഡിപ്പിച്ചിരുന്നതായി യുവതി പൊലീസിനു നൽകിയ പരാതിയിൽ പറയുന്നു. യുവതിയെ ബലാത്സംഗം ചെയ്ത പ്രതിയും പൊലീസ് പിടിയിലായി.  30കാരനായ സൊഹൈൽ ഖാനാണ് പിടിയിലായത്. തുടർന്ന് ഇയാളെ പൊലീസ് അറസ്റ്റ് ചെയ്തു. സൊഹൈൽ ഖാനാണ് യൂട്യൂബ് വീഡിയോ കണ്ട് ഗർഭച്ഛിദ്രം നടത്താൻ യുവതിയോട് നിർദേശിച്ചത്. ഇതനുസരിച്ച് ഗർഭഛിദ്രം നടത്താൻ ശ്രമിച്ച യുവതിയുടെ ആരോഗ്യനില ഗുരുതരമാവുകയും ഉടൻ വീട്ടുകാർ ആശുപത്രിയിൽ എത്തിക്കുകയുമായിരുന്നു.

ഏഴ് മാസം ഗർഭിണിയായിരുന്നു യുവതി. വിവാഹ വാഗ്ദാനം നൽകിയിരുന്നെങ്കിലും യുവതി ഗർഭിണി ആയതോടെ വിവാഹം കഴിക്കാൻ കഴിയില്ലെന്ന് യുവാവ് അറിയിച്ചു. തുടർന്ന് ഗർഭഛിദ്രം നടത്താൻ യുവാവ് നിർബന്ധിക്കുകയായിരുന്നു. യൂട്യൂബ് വിഡിയോകളിൽ നിന്ന് ഗർഭഛിദ്രം എങ്ങനെയെന്ന് മനസ്സിലാക്കിയ യുവതി ഇതിനു ശ്രമിക്കവെയാണ് ആരോഗ്യനില വഷളായത്.