കൊച്ചി ഇടപ്പള്ളിയിലെ ഫ്ലാറ്റിൽ തൂങ്ങി മരിച്ച നിലയിൽ കണ്ടെത്തിയ ട്രാൻസ്ജെൻഡർ അനന്യ കുമാരി അലക്സിൻറെ പോസ്റ്റുമോർട്ടം പൂർത്തിയായി. കളമശേരി മെഡിക്കൽ കോളജ് ആശുപത്രിയിൽ രണ്ട് ഡോക്ടർമാരുടെ നേതൃത്വത്തിലുള്ള പ്രത്യേക സംഘമാണ് പോസ്റ്റുമോർട്ടം നടത്തിയത്. അനന്യയുടേത് തൂങ്ങിമരണമാണെന്നാണ് പോസ്റ്റ് മോർട്ടത്തിലെ പ്രാഥമിക നിഗമനം.ലിംഗമാറ്റ ശസ്ത്രക്രിയയിൽ പിഴവുണ്ടോയെന്നത് മെഡിക്കൽ റെക്കോഡ്‌സ് പരിശോധനയ്ക്ക് ശേഷം വിലയിരുത്തുമെന്നാണ് പൊലീസ് അറിയിച്ചത്. അതേസമയം അന്വേഷണത്തിൽ ലിംഗമാറ്റ ശസ്ത്രകിയയിലെ ചികിത്സ പിഴവ് അടക്കമുള്ള കാര്യങ്ങളിൽ വ്യക്തതയുണ്ടാകുമെന്ന പ്രതീക്ഷയിലാണ് അനന്യയുടെ ബന്ധുക്കളും സുഹൃത്തുക്കളും. രാവിലെ എട്ടുമണിയോടെ ഇൻക്വസ്റ്റ് നടപടികൾ ആരംഭിച്ചു. പോസ്റ്റുമോർട്ടത്തിനു ശേഷം പന്ത്രണ്ടു മണിയോടെ മൃതദേഹം ബന്ധുക്കൾക്ക് വിട്ടു നൽകി.