നാദാപുരം നരിക്കാട്ടേരിയിൽ 16 കാരന്റെ മരണത്തിൽ തുടരന്വേഷണം നടത്താൻ റൂറൽ എസ്.പിയുടെ ഉത്തരവ്. അബ്ദുൾ അസീസിന്റെ മരണം കൊലപാതകമാണെന്ന സൂചനകൾ പുറത്ത് വന്നതോടെയാണ് തുടരന്വേഷണം നടത്താൻ എസ്.പി ഉത്തരവിട്ടത്.

അസീസിനെ സഹോദരൻ സഫ്‌വാൻ മർദിക്കുന്നതിന്റെ ദൃശ്യങ്ങൾ പുറത്ത് വന്നതിനു പിന്നാലെ സമഗ്ര അന്വേഷണം നടത്തണമെന്ന ആവശ്യവുമായി നാട്ടുകാർ രംഗത്തെത്തിയിരുന്നു. ലോക്കൽ പൊലീസ് നടത്തിയ അന്വേഷണത്തിൽ ആത്മഹത്യയാണെന്നായിരുന്നു കണ്ടെത്തൽ. അബ്ദുൾ അസീസിന്റെ ചില ബന്ധുക്കളും നാട്ടുകാരും മരണം കൊലപാതകമാണെന്ന് കാട്ടി പ്രതിഷേധിച്ചതോടെ അന്വേഷണം ജില്ലാ ക്രൈംബ്രാഞ്ചിന് കൈമാറി. 2020 മെയ് 17നായിരുന്നു കുടുംബാംഗങ്ങളെല്ലാം വീട്ടിലുണ്ടായിരിക്കേ മുറിയിൽ തൂങ്ങി മരിച്ച നിലയിൽ അബ്ദുൾ അസീസിനെ കണ്ടെത്തിയത്.